കൃഷ്ണേന്ദു കലേഷ് ചിത്രം ‘പ്രാപ്പെട’ റോട്ടര്‍ഡാം ഫെസ്റ്റിവലിലേക്ക്

സംവിധായകന്‍ കൃഷ്ണേന്ദു കലേഷിന്റെ 'പ്രാപ്പെട' റോട്ടര്‍ഡാം ഫിലിം ഫെസ്റ്റിവലിലേക്ക്. ചിത്രം ഫിലിം ഫെസറ്റിവലിലേക്ക് ഔദ്യോഗിക എന്‍ട്രിയായ വിവരം കലേഷ് തന്നെയാണ് ഫേസ്ബുക്ക് പേജിലൂടെ അറിയിച്ചത്. തന്റെ ആദ്യ ചിത്രമായ പ്രാപ്പെട റോട്ടര്‍ഡാം ഫിലിം ഫെസ്റ്റിവലിലേക്ക് തെരഞ്ഞെടുത്ത വിവരം സന്തോഷത്തോടെയും അഭിമാനത്തോടെയും അറിയിക്കുന്നുവെന്ന് കലേഷ് ഫേസ്ബുക്കില്‍ പറഞ്ഞു. ചിത്രത്തിന്റെ ഔദ്യോഗക എന്‍ട്രി സംബന്ധിച്ച പോസ്റ്റര്‍ സംവിധായകന്‍ ലിജോ ജോസ് പെല്ലിശ്ശേരി സാമൂഹിക മാധ്യമങ്ങളില്‍ പങ്കുവച്ചു. കൃഷ്ണേന്ദു കലേഷിന്റെ വാക്കുകള്‍; എന്റെ പ്രഥമ ചിത്രം 'പ്രാപ്പെട റോട്ടര്‍ഡാം ഇന്റര്‍നാഷണല്‍ ഫിലിം ഫെസ്ടിവലിലേക്കുള്ള ഔദ്യോഗിക എന്‍ട്രി ആയി പ്രഖ്യാപിച്ചരിക്കുന്ന വിവരം സന്തോഷത്തോടെയും അഭിമാനത്തോടെയും അറിയിക്കട്ടെ. ആദ്യദിവസം മുതല്‍ ഈ ചിത്രത്തോടും എന്നോടുമൊപ്പം തോള്‍ചേര്‍ന്നു സഞ്ചരിച്ച നിര്‍മ്മാതാവായ ജയനാരായണനോടുള്ള നന്ദി ആദ്യമേ അറിയിക്കട്ടെ. വിറങ്ങലിച്ച ആദ്യ കോവിഡ് കാലത്തു ഷൂട്ട് തുടങ്ങിയ ശേഷം ഇന്ന് വരെയുള്ളതു ദീര്ഘമായൊരു യാത്രയായിരുന്നു എന്നതും അതിന്റെ ഉയര്‍ച്ചതാഴ്ചകളും ജയനറിയാം. ഒപ്പം തന്നെ ആദ്യം മുതല്‍ക്കെ നിര്‍മ്മാണത്തിലും ക്രിയാത്മകതയിലും സ്വന്തം സിനിമയായി കണ്ടു കൂടെനിന്ന ക്യാമറാമാന്‍ മനേഷ് മാധവനും സംഘവും, പ്രിയസുഹൃത്തും എഡിറ്ററുമായ കിരണ്‍ ദാസ്, പലവൈദഗ്ധ്യത്തിലുള്ള വിഷ്വല്‍ ഇഫക്ട് ചെയ്തു ബ്രദര്‍ലി ആയി മാറിയ തൗഫീഖ്, റഫ് എഡിറ്റ് കണ്ടതിനു ശേഷം സന്തോഷത്തോടെയും ക്ഷമയോടെയും സഹകരിച്ച ബിജിയേട്ടന്‍, എല്ലാക്കാലവും എല്ലാ പദ്ധതികളിലും ചേര്‍ന്ന് നിന്ന കൂട്ടുകാരന്‍നടന്‍ നിതിന്‍, സിനിമക്കായി സകല റിസ്‌കും ഏറ്റെടുത്തു കോവിഡു കാലത്തു പൂനെയില്‍ നിന്നും എത്തിച്ചേര്‍ന്നു ഷൂട്ട് തീരുന്നത് വരെ സന്തോഷത്തോടെ സഹകരിച്ച നടി കേതകി, ഓടിവന്നു തന്റെ എല്ലാ എനര്‍ജിയും സിനിമക്കായി തന്ന വിചിത്രമനുഷ്യന്‍ രാജേഷ് മാധവന്‍, പ്രകൃതിയില്‍ ഉള്ള മെറ്റീരിയല്‍സ് കൊണ്ട് വീടിനെ കഥാപാത്രമാക്കിയ കലാസംവിധായകന്‍ ഇന്ദുലാലും സംഘവും, സിനിമയുടെ ക്രിയാത്മകമായ കാര്യങ്ങളില് ചേര്‍ന്ന്നിന്ന് സഹകരിച്ച മള്‍ട്ടി കഴിവുകളും സ്നേഹവുമുള്ള സുഹൃത്ത് മിഥുന്‍ മുരളി, നാട്ടുകാരനും സംവിധാനസഹായിയുമായ അമല്‍, ആദ്യചര്‍ച്ചകളില്‍ സജീവമായിരുന്ന എഴുത്തുകാരന്‍ വിവേക് ചന്ദ്രന്‍, സുഹൃത്തും ശബ്ദവിഭാഗവും കൈകാര്യം ചെയ്ത നിതിന്‍ ലൂക്കോസ്, വളരെ പെട്ടെന്ന് കഥാപാത്രയോഗ്യമായ സ്റ്റൈലിംഗ് ചെയ്തു തന്ന ഗായത്രി, അവരുടെ ചുറുചുറുക്കുള്ള അസിസ്റ്റന്റുമാര്‍, പ്രദീപ് വിദുര സെറ്റിലെ സംസാരപ്രിയനും സഹൃദയനുമായ നടന്‍ ആര്‍ ജെ മുരുകന്‍, മനോ അളിയന്‍, വര്‍ക്കേഴ്സിന്റെ ചെറുവേഷം അഭിനയിക്കാനായി വന്നു ഞെട്ടിച്ച പിള്ളേരുകള്‍, നാടിനെവലിയൊരു എസ്റ്റേറ്റിനെ ഡിസ്‌കവര്‍ ചെയ്യാന്‍ സഹായിച്ച കണ്‍ട്രോളര്‍ രാജേന്ദ്രന്‍, സഹായങ്ങളുമായി കൂടെ നിന്ന കെന്നി, ദിനക്, പിന്നെ ഷോര്‍ട് നൊട്ടീസില്‍ വന്നു വിസ്മയകരമായി അഭിനയിച്ച നീന കുറുപ്പ്, ശ്രീകാന്ത് പങ്ങപ്പാട്ട് തുടങ്ങിയവര്‍, ഒടുവിലായി സിനിമയുടെ ഭാഗമായ മിക്സര്‍ പ്രശാന്ത്, സൗണ്ട് എഡിറ്റര്‍ ഷമീര്‍, സബ് ചെയ്ത പരിപ്പായിയും ശ്യാമും, പരസ്യകലാകാരനായ പ്രതൂല്‍ തുടങ്ങിയവര്‍ അങ്ങനെ ധാരാളം പേരുകള്‍... ഒപ്പം പ്രീവ്യൂ കണ്ടു ആശാവഹമായ പ്രതികരണങ്ങളും, ക്രിയാത്മകമായ ഫീഡ്ബാക്കുകളും നല്‍കിയ തിരക്കഥാകൃത്തുക്കളായ പി എഫ് മാത്യൂസ്, സാബ് ജോണ്‍, ശ്യാംപുഷ്‌ക്കരന്‍, ജയന്‍ ചെറിയാന്‍, ഡോണ്‍ പാലാത്തറ, റോബി കുര്യന്‍ അവരോടൊക്കെയും ഈ സന്തോഷം പങ്കുവെക്കുന്നു.