പകല്‍നേരത്ത് ആക്രിക്കാരന്‍, രാത്രിയായാല്‍ കള്ളന്‍; ലിജോ പടത്തിലെ മമ്മൂട്ടി കഥാപാത്രം ഇങ്ങനെ?

മമ്മൂട്ടിയും സംവിധായകന്‍ ലിജോ ജോസ് പെല്ലിശ്ശേരിയും ഒന്നിക്കുന്നു എന്ന വാര്‍ത്ത മലയാള സിനിമാപ്രേമികള്‍ വലിയ ആവേശത്തോടെയാണ് ഏറ്റെടുത്തത്. ചിത്രത്തിന്റെ ഓരോ അപ്‌ഡേറ്റിനും സോഷ്യല്‍ മീഡിയയില്‍ നിന്നും മികച്ച പ്രതികരണവും ലഭിച്ചു. ഇപ്പോഴിതാ സിനിമയിലെ നടന്റെ കഥാപാത്രത്തെക്കുറിച്ചുള്ള വാര്‍ത്തകളാണ് ചര്‍ച്ചയാകുന്നത്. മമ്മൂട്ടി ഇതുവരെ അവതരിപ്പിക്കാത്ത ഒരു കഥാപാത്രമായിരിക്കും നന്‍പകല്‍ നേരത്ത് മയക്കത്തിലേത്. പകല്‍ സമയത്ത് സൈക്കിള്‍ മെക്കാനിക്കും ആക്രിക്കാരനും, രാത്രിയായാല്‍ ലോക്കല്‍ കള്ളനുമായാണ് നടന്‍ സിനിമയില്‍ എത്തുന്നത് എന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നു. 'നകുലന്‍' അഥവാ 'വേലന്‍' എന്നായിരിക്കും മമ്മൂട്ടിയുടെ കഥാപാത്രത്തിന്റെ പേര്. രമ്യ പാണ്ഡ്യനാണ് സിനിമയിലെ നായിക കഥാപാത്രത്തെ അവതരിപ്പിക്കുന്നത്. മമ്മൂട്ടിയുടെ ഭാര്യ കഥാപാത്രമായ 'മയില്‍' ആയാണ് രമ്യ സിനിമയില്‍ അഭിനയിക്കുന്നത്. മമ്മൂട്ടി കമ്പനി'യുടെ ബാനറില്‍ മമ്മൂട്ടി തന്നെയാണ് 'നന്‍പകല്‍ നേരത്ത് മയക്കം' എന്ന ചിത്രം നിര്‍മ്മിക്കുന്നത്. ചിത്രം മലയാളത്തിലും തമിഴിലും ആയാണ് ഒരുങ്ങുന്നത്. ലിജോയുടെ കഥയ്ക്ക് എസ് ഹരീഷാണ് തിരക്കഥയും സംഭാഷണവും ഒരുക്കുന്നത്. പേരന്‍പ്, പുഴു എന്നീ ചിത്രങ്ങള്‍ക്ക് ക്യാമറ ചലിപ്പിച്ച തേനി ഈശ്വരനാണ് ക്യാമറ കൈകാര്യം ചെയ്തിരിക്കുന്നത്. അശോകനും ചിത്രത്തില്‍ പ്രധാന കഥാപാത്രമായി എത്തുന്നുണ്ട്.