‘ഒരു നടുക്കടലില്‍പെട്ട അവസ്ഥയിലായിരുന്നു’; കുറിപ്പുമായി മാളവിക മോഹന്‍

ദുല്‍ഖര്‍ സല്‍മാന്‍ നായകനായ ചിത്രം 'പട്ടം പോലെ'യിലൂടെ അഭിനയ രംഗത്തേക്ക് എത്തിയ നടിയാണ് മാളവിക മോഹന്‍. കഴിഞ്ഞ വര്‍ഷം വിജയ് നായകനായ 'മാസ്റ്ററില്‍' നടിയുടെ പ്രകടനം ഏറെ ശ്രദ്ധ നേടിയിരുന്നു. ഇപ്പോഴിതാ 2021ലെ തന്റെ വ്യക്തി ജീവിതത്തെക്കുറിച്ച് കുറിപ്പുമായി എത്തിയിരിക്കുകയാണ് മാളവിക. കഴിഞ്ഞ വര്‍ഷം സിനിമാ ജീവിതം ഏറെ സന്തോഷം നിറഞ്ഞത് ആയിരുന്നു എങ്കിലും വ്യക്തി ജീവിതത്തില്‍ ഏറെ മോശം അവസ്ഥലകളിലൂടെയാണ് കടന്നു പോയത് എന്ന് നടി പറയുന്നു. സുഹൃത്തുക്കളും കുടുംബവുമാണ് തന്നെ ആ അവസ്ഥയില്‍ മുന്നോട്ടു നയിച്ചത് എന്നും നടി കൂട്ടിച്ചേര്‍ത്തു. ഇന്‍സ്റ്റാഗ്രാമിലൂടെയാണ് മാളവികയുടെ പ്രതികരണം. മാളവികയുടെ വാക്കുകള്‍: ഇത് വളരെ കഠിനമായ ഒരു വര്‍ഷമായിരുന്നു. നമ്മുടെ ജീവിതത്തിന്റെ നല്ലതും രസകരവുമായ വശങ്ങള്‍ മാത്രമായിരിക്കും പുറത്ത് കാണിക്കുക. അതും മനസ്സിലാക്കാവുന്നതേയുള്ളൂ. കാരണം ആരാണ് മോശം ഭാഗങ്ങള്‍ കാണിക്കാനും ഓര്‍മ്മിക്കാനും ആഗ്രഹിക്കുന്നത്, അല്ലേ? ഈ വര്‍ഷം മറ്റേതൊരു വര്‍ഷത്തേക്കാളും വളരെ കഠിനമായിരുന്നു. പ്രൊഫഷണല്‍ കാര്യങ്ങള്‍ മികച്ചതായിരുന്നു. എന്റെ ആദ്യ റിലീസ് ആ വര്‍ഷത്തെ തന്നെ ഏറ്റവും വലിയ വിജയങ്ങളില്‍ ഒന്നായി, ഞങ്ങളുടെ തലമുറയിലെ എന്റെ പ്രിയപ്പെട്ട നടന്‍മാരില്‍ ഒരാളുമായി മറ്റൊരു പ്രോജക്റ്റില്‍ വര്‍ക്ക് ചെയ്യാന്‍ കഴിഞ്ഞു. അദ്ദേഹത്തില്‍ നിന്നും നിരവധി കാര്യങ്ങള്‍ പഠിക്കാനും സാധിച്ചു. ആദ്യമായി ബോളിവുഡിലും അഭിനയിച്ചു. അങ്ങനെ അതിശയിപ്പിക്കുന്ന കാര്യങ്ങളുടെ വലിയ നിര തന്നെയുണ്ട്. എന്നാല്‍ വ്യക്തിപരമായി ഞാന്‍ ഒരു നടുക്കടലില്‍പെട്ട അവസ്ഥയിലായിരുന്നു. എന്റെ ജീവിതത്തിലെ തന്നെ ഏറ്റവും മോശം അവസ്ഥകളിലൂടെയാണ് കഴിഞ്ഞ കുറച്ച് മാസങ്ങളായി ഞാന്‍ കടന്നു പോകുന്നത്. ഈ കരിയര്‍ തന്നെ നിരവധി അനിശ്ചിതത്വങ്ങള്‍ നിറഞ്ഞതാണ്, വ്യക്തിജീവിതത്തിലും അതിന്റെ അഭാവം ആത്മാവിനെ തകര്‍ക്കും. ഈ സമയത്ത് എന്നെ മുന്നോട്ട് നയിച്ച ഒരേയൊരു ശക്തി എന്റെ സുഹൃത്തുക്കളാണ് (എന്റെ കുടുംബത്തിന് പുറമെ). 2021ലെ ഏറ്റവും നല്ല ഭാഗം എന്നെ സംബന്ധിച്ചിടത്തോളം എന്റെ സുഹൃത്തുക്കളാണ്. നിങ്ങളും നല്ല സുഹൃത്തുക്കള്‍ക്കൊപ്പം ആവണമെന്ന് ഞാന്‍ ആഗ്രഹിക്കുന്നു.