മിന്നലേറ്റ് മോഹന്‍ലാല്‍, ബ്രൂസ് ലി ബിജിയായി ശോഭന: 90കളിലെ ‘മിന്നല്‍ മുരളി’

ബേസില്‍ ജോസഫ് ടോവിനോ ചിത്രം മിന്നല്‍ മുരളി ജൈത്രയാത്ര തുടരുമ്പോള്‍ 'മിന്നല്‍ മുരളി'യിലെ നായകന്‍ ജെയ്സണും, നായിക ബ്രൂസ് ലി ബിജിയ്ക്കും ഒരു പുതിയ ഗെറ്റപ്പ് തന്നെ കൊടുക്കുകയാണ് സോഷ്യല്‍ മീഡിയ ആരാധകര്‍. ഇപ്പോള്‍ '90സിലെ മിന്നല്‍ മുരളി' ഫോട്ടോയാണ് പ്രചാരം നേടുന്നത്. ടൊവിനോയ്ക്ക് പകരം മോഹന്‍ലാലിന്റേയും ഫെമിനയ്ക്ക് പകരം ശോഭനയുടെയും ചിത്രം ചേര്‍ത്താണ് എഡിറ്റ് ചെയ്തിരിക്കുന്നത്. ചിത്രം സോഷ്യല്‍ മീഡിയകളില്‍ വയറലായി കഴിഞ്ഞു. മിന്നല്‍ മുരളി നെറ്റ്ഫ്‌ലിക്‌സിന്റെ ഇന്ത്യ ടോപ് ടെന്‍ ലിസ്റ്റില്‍ ഒന്നാം സ്ഥാനം നേടി ശ്രദ്ധനേടുകയാണ്. നെറ്റ്ഫ്‌ലിക്‌സ് തന്നെ പുറത്തിറക്കാറുള്ള ആഗോള ടോപ്പ് ടെന്‍ ലിസ്റ്റിലും മിന്നല്‍ മുരളിയ്ക്ക് ഇടംപിടിക്കാനായി. 60 ലക്ഷം മണിക്കൂറുകളോളമാണ് മിന്നല്‍ മുരളി' നെറ്റ്ഫ്‌ലിക്‌സില്‍ സ്ട്രീം ചെയ്തിരിക്കുന്നത്. ഒടിടി റിലീസ് ആയി നെറ്റ്ഫ്‌ലിക്‌സിന്റെ മറ്റൊരു സിനിമയ്ക്കും ഇല്ലാത്ത വരവേല്‍പ്പായിരുന്നു തുടക്കം മുതലേ 'മിന്നല്‍ മുരളി'ക്ക് ലഭിച്ചുകൊണ്ടിരുന്നത്. 24ന് ഉച്ചയ്ക്ക് 1.30നായിരുന്നു റിലീസ്. ചിത്രത്തിന്റെ ആദ്യ പ്രതികരണങ്ങള്‍ നാലരയോടെ എത്തിത്തുടങ്ങിയിരുന്നു. അടുത്തകാലത്തൊന്നും ഇത്രയും ആകാംഷനിറഞ്ഞതും എന്നാല്‍ റിലീസിന് ശേഷം അതെ ആവേശം തന്നെ നിലനിര്‍ത്തുന്നതുമായ സിനിമ 'മിന്നല്‍ മുരളി' തന്നെയാണ് എന്ന നിരവധി പ്രതികരണങ്ങളും ചിത്രത്തിന്റെ വിജയത്തിന്റെ ഭാഗമാണ്. 'ഗോദ' എന്ന സൂപ്പര്‍ ഹിറ്റ് സിനിമയ്ക്ക് ശേഷം ടൊവിനോ തോമസും സംവിധായകന്‍ ബേസില്‍ ജോസഫും ഒന്നിക്കുന്ന സിനിമയാണ് മിന്നല്‍ മുരളി. മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലാണ് ചിത്രം എത്തിയിരിക്കുന്നത്. ടൊവിനോയുടെ കരിയര്‍ ബേസ്ഡ് സിനിമയായി തന്നെ 'മിന്നല്‍ മുരളി' മാറിക്കഴിഞ്ഞിരിക്കയാണ്.