വിടവാങ്ങിയത് ഏറ്ററവും കൂടുതല്‍ സാഹിത്യകൃതികള്‍ സിനിമയാക്കിയ സംവിധായകന്‍

ദേശീയ ശ്രദ്ധ നേടിയ നിരവധി ചിത്രങ്ങള്‍ മലയാളത്തിന് സമ്മാനിച്ച അതുല്യപ്രതിഭയായിരുന്നു കെ എസ് സേതുമാധവന്‍. സത്യന്‍ മികച്ച വേഷങ്ങളിലെത്തിയ ഓടയില്‍ നിന്ന്, അനുഭവങ്ങള്‍ പാളിച്ചകള്‍, ബാലന്‍ കെ നായര്‍ക്ക് ദേശീയ പുരസ്‌കാരം നേടിക്കൊടുത്ത ഓപ്പോള്‍, ജയചന്ദ്രന് സുപ്രഭാതം എന്ന പാട്ടിലൂടെ ദേശീയ പുരസ്‌കാരം നേടിക്കൊടുത്ത പണി തീരാത്ത വീട് എന്നിങ്ങനെ സേതുമാധവന്റെ സംവിധാനമികവില്‍ മലയാള ചലച്ചിത്രം ദേശീയ പുരസ്‌കാര വേദികളില്‍ നിറഞ്ഞു നിന്നിരുന്നു. കമല്‍ഹാസന്‍ ബാലതാരമായി എത്തിയ 'കണ്ണും കരളും' ആണ് ആദ്യ മലയാള സിനിമ. ജ്ഞാനസുന്ദരി എന്ന ചിത്രത്തിലൂടെയാണ് സോതുമാധവന്റെ പടയോട്ടം ആരംഭിക്കുന്നത്. ഏറ്ററവും കൂടുതല്‍ സാഹിത്യകൃതികള്‍ സിനിമയാക്കിയ സംവിധായകനായിരുന്നു അദ്ദേഹം. മലയാളത്തനിമ സിനിമയില്‍ പകര്‍ത്താന്‍ കഴിഞ്ഞുവെന്നതും അദ്ദേഹത്തിന്റെ പ്രത്യേകതയാണ്. പാലക്കാട് സുബ്രഹ്മണ്യം ലക്ഷ്മി ദമ്പതികളുടെ മകനായി 1931 ലാണ് സേതുമാധവന്‍ ജനിച്ചത്. മൂന്നു സഹോദരിമാരും ഒരു സഹോദരനുമുണ്ട്. തമിഴ്നാട്ടിലെ വടക്കേ ആര്‍ക്കോട്ടിലും പാലക്കാട്ടുമായിരുന്നു ബാല്യം. പാലക്കാട് വിക്ടോറിയ കോളജില്‍ നിന്ന് സസ്യശാസ്ത്രത്തില്‍ ബിരുദം നേടി. സംവിധായകന്‍ കെ രാംനാഥിന്റെ സഹായി ആയാണ് സിനിമയില്‍ എത്തിയത്. എല്‍വി പ്രസാദ്, എഎസ്എ സ്വാമി, സുന്ദര്‍ റാവു, നന്ദകര്‍ണി എന്നീ സംവിധായകരുടെ കൂടെ നിന്ന് സംവിധാനം പഠിച്ചു. 1960ല്‍ വീരവിജയ എന്ന സിംഹള ചിത്രത്തിലൂടെയാണ് സേതുമാധവന്‍ സ്വതന്ത്ര സംവിധായകനാകുന്നത്. 1960 മുതല്‍ 1995 വരെയുള്ള കാലമായികരുന്നു സേതുമാധവന്‍ സിനിമയില്‍ സജീവമായിരുന്നത്. 1961 ലാണ് ജ്ഞാനസുന്ദരി സംവിധാനം ചെയ്യുന്നത്. പിന്നീട് നിത്യ കന്യക, സുശീല, മണവാട്ടി, ഓമനക്കുട്ടന്‍, ഓടയില്‍ നിന്ന്, അര്‍ച്ചന, സ്ഥാനാര്‍ത്ഥി സാറാമ്മ, ഭാര്യമാര്‍ സൂക്ഷിക്കുക, അടിമകള്‍, കടല്‍പ്പാലം, അര നാഴിക നേരം, വാഴ്വേ മായം എന്നിങ്ങനെ നിരവധി ചിത്രങ്ങള്‍ സംവിധാനം ചെയ്തു. 1965 ലാണ് അദ്ദേഹത്തിന് ആദ്യമായി ദേശീയ ചലച്ചിത്ര പുരസ്‌കാരം ലഭിക്കുന്നത്. ഓടയില്‍ നിന്ന് എന്ന സിനിമയ്ക്കായിരുന്നു പുരസ്‌കാരം. പിന്നീട് ഒന്‍പത് തവണ അദ്ദേഹത്തെ തേടി ദേശീയ പുരസ്‌കാരമെത്തി. 1972 ല്‍ രണ്ട് ദേശീയ പുരസ്‌കാരത്തിന് അര്‍ഹനായിട്ടുണ്ട്. ഏഴ് തവണ സംസ്ഥാന പുരസ്‌കാരവും 2009 ല്‍ ജെ.സി ഡാനിയേല്‍ പുരസ്‌കാരവും അദ്ദേഹത്തിന് ലഭിച്ചിട്ടുണ്ട്. മലയാള സിനിമാ ലോകത്തിന്റെ സ്വര്‍ണ ഏടാണ് സേതുമാധവന്റെ സിനിമാകാലം. സേതുമാധവന്‍ എന്നും മലയാളികളുടെ മനസില്‍ അഴകുള്ള ഓര്‍മയായി നില്‍ക്കും.