‘ആ മുഖം’; ടൈറ്റിലും ഫസ്റ്റ് ലുക്ക് പോസ്റ്ററും പങ്കുവച്ച് താരങ്ങള്‍

ഒറ്റ കഥാപാത്രം മാത്രമുള്ള മലയാളത്തിലെ മറ്റൊരു ചിത്രം 'ആ മുഖം' ഫസ്റ്റ് ലുക്ക് പോസ്റ്റര്‍ പുറത്ത്. മലയാള താരങ്ങളായ മോഹന്‍ലാല്‍ മമ്മൂട്ടി, സുരേഷ് ഗോപി തുടങ്ങിയവര്‍ പോസ്റ്റര്‍ സമൂഹ മാധ്യമങ്ങളിലൂടെ പുറത്തിറക്കി. ഷോര്‍ട്ട് ഫിലിമുകളിലൂടെ ശ്രദ്ധേയനായ അഭിലാഷ് പുരുഷോത്തമന്‍ രചനയും സംവിധാനവും നിര്‍വ്വഹിക്കുന്ന ചിത്രമാണ് 'ആ മുഖം'. ഒരു കഥാപാത്രം മാത്രമാണ് ചിത്രത്തില്‍ പ്രത്യക്ഷപ്പെടുക. 'മീര' എന്ന കഥാപാത്രത്തെ മികച്ച നടിക്കുള്ള സംസ്ഥാന അവാര്‍ഡ് നേടിയിട്ടുള്ള പ്രിയങ്ക നായര്‍ ആണ് കഥാപാത്രത്തെ അവതരിപ്പിക്കുന്നത്. സ്‌കിസോഫ്രീനിയ എന്ന മാനസികരോഗത്തിനടിമയായി ഒറ്റപ്പെട്ടുപോയ ഒരു സ്ത്രീ കടന്നു പോകുന്ന പ്രശ്‌നങ്ങളും അവരുടെ അതിജീവനവുമാണ് കഥയുടെ പ്രമേയം. തമിഴിലും മലയാളത്തിലുമായാണ് ചിത്രം എത്തുക. നബീഹ മൂവി പ്രൊഡക്ഷന്റെ ബാനറില്‍ നുഫൈസ് റഹ്മാന്‍ ആണ് ചിത്രത്തിന്റെ നിര്‍മ്മാണം. ഛായാഗ്രഹണം പ്രതാപ് പി നായര്‍, ശബ്ദലേഖനം ടി കൃഷ്ണനുണ്ണി, എഡിറ്റിംഗ് സോബിന്‍ കെ സോമന്‍, ശ്യം കെ വാര്യര്‍ എഴുതി ദീപാങ്കുരന്റെ സംഗീതത്തില്‍ സിത്താര കൃഷ്ണകുമാറും ദീപാങ്കുരനും ആലപിക്കുന്ന രണ്ട് ഗാനങ്ങളും ചിത്രത്തില്‍ ഉണ്ട്.