‘ഗര്‍ഭപാത്രത്തിലും ശവക്കല്ലറയിലും മാത്രമാണ് സുരക്ഷിത’; നോവായി വിദ്യാര്‍ഥിനിയുടെ കുറിപ്പ്

നഗരത്തില്‍ സ്‌കൂള്‍ വിദ്യാര്‍ഥിനിയുടെ ആത്മഹത്യയുമായി ബന്ധപ്പെട്ടു 21 വയസ്സുകാരന്‍ അറസ്റ്റില്‍. ശാരീരിക പീഡനത്തിനാണ് കോളജ് വിദ്യാര്‍ഥിയായ യുവാവിനെ അറസ്റ്റ് ചെയ്തത്. ഇയാള്‍ക്കെതിരെ പോക്‌സോ നിയമപ്രകാരം കേസെടുത്തു. 'ഒരു പെണ്‍കുട്ടി അവളുടെ അമ്മയുടെ ഗര്‍ഭപാത്രത്തിലും ശവക്കല്ലറയിലും മാത്രമാണ് സുരക്ഷിത ആവുക' എന്നു ആത്മഹത്യാക്കുറിപ്പ് എഴുതിയ ശേഷമാണ് വിദ്യാര്‍ഥിനി ജീവനൊടുക്കിയത്. 'ശാരീരിക പീഡനങ്ങള്‍ അവസാനിപ്പിക്കുക, എനിക്ക് നീതി വേണം' എന്നും വിദ്യാര്‍ഥിനി ആത്മഹത്യാക്കുറിപ്പില്‍ എഴുതി. 'ബന്ധു, അധ്യാപകന്‍, എല്ലാവരും' എന്നാണ് ശാരീരിക പീഡനം നടത്തിയ ആളുകളെ കുറിച്ചു പരാമര്‍ശിച്ചിരിക്കുന്നത്. ശനിയാഴ്ച വീട്ടില്‍ തൂങ്ങിമരിച്ച നിലയില്‍ വിദ്യാര്‍ഥിനിയെ അമ്മയാണ് കണ്ടെത്തിയത്. മാര്‍ക്കറ്റില്‍ പോയി തിരിച്ചെത്തിയ ഒരു മണിക്കൂറിനുള്ളില്‍ മരണം സംഭവിക്കുകയായിരുന്നു. 'പെണ്‍കുട്ടിയുമായി ശാരീരികബന്ധം പുലര്‍ത്തിയതായി യുവാവ് കുറ്റസമ്മതം നടത്തി. അശ്ലീല സന്ദേശങ്ങളും ചിത്രങ്ങളും ഫോണില്‍നിന്നു കണ്ടെത്തി. ഇരുവരും തമ്മില്‍ എട്ടു മാസത്തോളമായി അടുപ്പത്തിലായിരുന്നു. കഴിഞ്ഞ രണ്ടാഴ്ച നിരന്തരമായി ഉപദ്രവിച്ചു'- പൊലീസ് പറഞ്ഞു.