‘മകന്‍ ഒളിംപ്യനാകാന്‍ തയ്യാറെടുക്കുന്നു’; മാധവനും കുടുംബവും ദുബൈയിലേക്ക്

2026ലെ ഒളിമ്പിക്‌സിലേക്ക് തയ്യാറെടുക്കുകയാണ് നടന്‍ മാധവന്റെ മകന്‍ വേദാന്ത്. അതിനു വേണ്ടി ദുബൈയിലേക്ക് താമസം മാറിയിരിക്കുകയാണ് താരവും കുടുംബവും. ഒരഭിമുഖത്തിലൂടെയാണ് താരം ഇക്കാര്യം അറിയിച്ചത്. കോവിഡ് പ്രതിസന്ധിയെ തുടര്‍ന്ന് ഇന്ത്യയിലെ പ്രധാന നീന്തല്‍ പരിശീലന കേന്ദ്രങ്ങളെല്ലാം അടച്ചിട്ടിരുന്നു. ഇതോടെയാണ് മകന്‍ വേദാന്തിന് ഒളിമ്പിക്‌സിനായി തയ്യാറെടുക്കുന്നതിന് താമസം മാറാന്‍ മാധവന്‍ തീരുമാനിച്ചത്. നീന്തല്‍ താരമായ വേദാന്ത് നിരവധി അന്താരാഷ്ട്ര മത്സരങ്ങളില്‍ പങ്കെടുത്തു വിജയിച്ചിട്ടുണ്ട്. അടുത്ത ലക്ഷ്യം 2026ലെ ഒളിംപിക്സാണ്. മുംബൈയിലെ വലിയ സ്വിമ്മിങ് പൂളുകളെല്ലാം അടച്ചിടുകയോ അല്ലെങ്കില്‍ അകലെയോ ആണ്. ദുബായില്‍ വലിയ പൂളുകളും സൗകര്യങ്ങളും കൂടുതലായതിനാല്‍ മകന് വേണ്ടി താമസം മാറുകയായിരുന്നുവെന്നാണ് മാധവന്‍ പറഞ്ഞത്. താനും ഭാര്യയും മകന് പൂര്‍ണ പിന്തുണയുമായി കൂടെയുണ്ട് എന്നും നീന്തല്‍ മത്സരങ്ങളിലെല്ലാം വിജയിച്ച മകന്‍ തങ്ങളുടെ അഭിമാനമാണെന്നും മാധവന്‍ പറഞ്ഞു. ഒപ്പം, തനിക്കോ ഭാര്യയ്‌ക്കോ മകന്‍ തന്നെ പോലെ സിനിമാ രംഗത്ത് എത്തണമെന്ന് അങ്ങനെയൊരു ആഗ്രഹമില്ല എന്നും മകന് അവന്റെതായ സ്വപ്നങ്ങളുണ്ടെന്നും അതിന് പൂര്‍ണ പിന്തുണ നല്‍കുകയാണ് തങ്ങള്‍ ചെയ്യുന്നതെന്നും അദ്ദേഹം വ്യക്തമാക്കി. ബാംഗ്ലൂരില്‍ നടന്ന നീന്തല്‍ ചാമ്പ്യന്‍ഷിപ്പില്‍ നാല് വെള്ളി മെഡലും മൂന്ന് വെങ്കലമെഡലും വേദാന്ത് സ്വന്തമാക്കിയിരുന്നു. കൂടാതെ 800 മീറ്റര്‍ ഫ്രീസ്‌റ്റൈല്‍, 1500 ഫ്രീസ്‌റ്റൈല്‍, 4X100 ഫ്രീസ്‌റ്റൈല്‍ റിലേ, 4X200 ഫ്രീ സ്‌റ്റൈല്‍ എന്നിവയിലും വെള്ളി മെഡല്‍ സ്വന്തമാക്കി. 100 മീറ്റര്‍ ഫ്രീസ്‌റ്റൈല്‍, 200 മീറ്റര്‍ ഫ്രീസ്‌റ്റൈല്‍, 400 മീറ്റര്‍ ഫ്രീസ്‌റ്റൈല്‍ എന്നിവയില്‍ വെങ്കല മെഡലും വേദാന്ത് നേടിയിട്ടുണ്ട്.