‘നന്ദകുമാര്‍ തീപ്പന്തം പിടിച്ച് ചുറ്റും ഓടുന്നു, 4 ദിവസത്തിനിടെ അവള്‍ പറഞ്ഞത് സ്വപ്നങ്ങള്‍ മാത്രം’

തിക്കോടി പഞ്ചായത്ത് ഓഫിസിലെ ജീവനക്കാരെല്ലാം ഞെട്ടലിലാണ്. സഹപ്രവര്‍ത്തകയെ ഓഫിസിനു മുന്നില്‍ കത്തിക്കരിഞ്ഞനിലയില്‍ കണ്ടതിന്റെ ആഘാതം ഇപ്പോഴും അവരെ വിട്ടുമാറിയിട്ടില്ല. വാര്‍ത്തകളിലൂടെ മാത്രം കേട്ടിട്ടുള്ള ഒരു ദുരന്തം നേരിട്ടു കണ്ട വേദന പറഞ്ഞറിയിക്കാനാവാത്തതാണെന്ന് ഇവര്‍ പറയുന്നു. കണ്‍മുന്നില്‍ കണ്ട ദുരന്തം ഓഫിസ് അക്കൗണ്ടന്റ് ഷമീന വിവരിച്ചു. 'രാവിലെ 9.50ഓടെ ഓഫിസിലെത്തിയ ഞങ്ങളാരും വന്ന സമയത്ത് നന്ദു ഓഫിസിനു പുറത്തുണ്ടായിരുന്നില്ല. പിന്നീട് ഒരു പെണ്‍കുട്ടിയുടെ കരച്ചില്‍ കേട്ടാണു ഞങ്ങളെല്ലാം ഓഫിസിനു പുറത്തേക്കോടിയത്. ഒരു ശരീരം കത്തിതാഴെ വീഴുന്നതും ഒരാള്‍ തീപ്പന്തം പിടിച്ചു ചുറ്റിലും ഓടുന്നതുമാണു കണ്ടത്, കത്തിക്കരിഞ്ഞു താഴെ വീണതു സഹപ്രവര്‍ത്തക കൃഷ്ണപ്രിയ ആണെന്നും അറിഞ്ഞില്ല. തിരിച്ചറിയാന്‍ പറ്റുംവിധമായിരുന്നില്ല ആ രൂപം. നന്ദുവിനെയും തങ്ങളാരും മുന്‍പു കണ്ടിട്ടില്ല.'- ആ സംഭവം വിവരിക്കുമ്പോഴും ഓഫിസ് അക്കൗണ്ടന്റ് ഷമീനയുടെ ശബ്ദത്തിലെ വിറയല്‍ വ്യക്തമായിരുന്നു. പഞ്ചായത്ത് ഓഫിസിലേക്കു സേവനാവശ്യത്തിനായി വന്ന ഒരാളും ഓഫിസ് ജീവനക്കാരും നിലവിളി കേട്ടെത്തിയ നാട്ടുകാരും ചേര്‍ന്നാണ് ഇരുവരെയും ആശുപത്രിയിലേക്കു കൊണ്ടുപോയത്. സമീപത്തുനിന്നു വാഴയില വെട്ടിക്കൊണ്ടുവന്ന് അതില്‍ കിടത്തിയാണ് നന്ദുവിനെയും കൃഷ്ണപ്രിയയെയും കൊണ്ടുപോയത്. പഞ്ചായത്ത് ഗ്രൗണ്ടില്‍ തന്നെയുള്ള കിണറ്റില്‍നിന്നു വെള്ളം കോരിയെടുത്ത് തീയണച്ചു. അപ്പോഴേക്കും സ്ഥലത്ത് പൊലീസും എത്തിയെന്നും ഷമീന പറഞ്ഞു. നാല് ദിവസങ്ങള്‍ക്ക് മുന്‍പാണ് കൃഷ്ണപ്രിയ തിക്കോടി ഓഫിസില്‍ ജോലിക്കു ചേര്‍ന്നത്. കൂടുതലൊന്നും സംസാരിക്കാനും പരിചയപ്പെടാനും സമയമായില്ലെങ്കിലും ശാന്തയായ ഒരു കുട്ടിയായാണ് ഞങ്ങള്‍ക്കു തോന്നിയതെന്ന് തിക്കോടി പഞ്ചായത്ത് അസിസ്റ്റന്റ് സെക്രട്ടറി പദ്മനാഭന്‍ പറയുന്നു. എങ്കിലും ഈ ദിവസത്തിനിടെ സംസാരിച്ചത് അവളുടെ സ്വപ്നങ്ങളെക്കുറിച്ചായിരുന്നു. പ്ലാന്‍ ക്ലര്‍ക്കുമായി നീറ്റ് പരീക്ഷ എഴുതുന്നതിനെക്കുറിച്ചും ഉപരിപഠനത്തെക്കുറിച്ചുമെല്ലാം ഏറെ സംസാരിച്ചിരുന്നു. തോല്‍വി ജീവിതത്തിലുണ്ടെന്ന യാഥാര്‍ത്ഥ്യം അറിഞ്ഞുവേണം കുട്ടികള്‍ വളരാന്‍, ഒപ്പം പ്രണയത്തെപ്പറ്റി വികലമായ സങ്കല്‍പ്പമാണുള്ളതെന്നും കണ്‍മുന്നില്‍ കണ്ട ദുരന്തത്തിന്റെ ഓര്‍മയില്‍ ജീവനക്കാര്‍ പറയുന്നു. കോഴിക്കോട്ട് തിക്കോടിയില്‍ കൃഷ്ണപ്രിയയെ തീകൊളുത്തിക്കൊന്നശേഷം ആത്മഹത്യയ്ക്കു ശ്രമിച്ച നന്ദകുമാര്‍ ശനിയാഴ്ച പുലര്‍ച്ചെയാണു മരിച്ചത്.