പഠിക്കാന്‍ മിടുക്കി, ജോലി കിട്ടിയിട്ട് 5 ദിവസം മാത്രം; കത്തിയെരിഞ്ഞ് വീടിന്റെ പ്രതീക്ഷ

യുവാവ് പെട്രോള്‍ ഒഴിച്ച് തീകൊളുത്തിയതിനെ തുടര്‍ന്നു കോഴിക്കോട് മെഡിക്കല്‍ കോളജ് ആശുപത്രിയില്‍ മരണത്തിനു കീഴടങ്ങിയ കൃഷ്ണപ്രിയയുടെ വേര്‍പാട് നാടിനും വീടിനും നൊമ്പരമായി. പഠിക്കാന്‍ മിടുക്കിയായ കൃഷ്ണപ്രിയയ്ക്കു ജോലി കിട്ടിയതിന്റെ ആഹ്ലാദത്തിലും പ്രതീക്ഷയിലുമായിരുന്നു വീട്ടുകാരും കൂട്ടുകാരും. എംസിഎ കഴിഞ്ഞ കൃഷ്ണപ്രിയ അഞ്ചു ദിവസം മുന്‍പാണ് തിക്കോടി പഞ്ചായത്തില്‍ പ്രോജക്ട് അസിസ്റ്റന്റിന്റെ താത്കാലിക ഒഴിവില്‍ ജോലിയില്‍ പ്രവേശിച്ചത്. അച്ഛനും അമ്മയും സഹോദരനും അടങ്ങുന്ന കൊച്ചുകുടുംബത്തിന്റെ പ്രതീക്ഷയായിരുന്നു ഈ മിടുക്കി. താല്‍ക്കാലിക ജോലിയാണെങ്കിലും ആ നിയമനം കുടുംബത്തിനു നല്‍കിയ സന്തോഷവും ആശ്വാസവും ചെറുതല്ല. പെട്രോള്‍ ഒഴിച്ച് തീ കൊളുത്തിയ നന്ദകുമാറുമായി കൃഷ്ണപ്രിയയ്ക്ക് സൗഹൃദമുണ്ടായിരുന്നു. ഇന്നലെ രാവിലെ 10 മണിയോടെ ദേശീയപാതയോരത്ത് തിക്കോടി പഞ്ചായത്ത് ഓഫിസിനു മുന്‍പില്‍ ഇരുവരും സംസാരിച്ചു നില്‍ക്കുന്നതിനിടെയാണ് നന്ദകുമാര്‍ കൃഷ്ണപ്രിയയുടെ ദേഹത്തും തന്റെ ദേഹത്തും പെട്രോള്‍ ഒഴിച്ച് ഞൊടിയിടയില്‍ ലൈറ്റര്‍ ഉരസി തീ കൊളുത്തിയത്. ആ സമയം ഓഫിസിന്റെ മതിലിനു പുറത്ത് റോഡരികില്‍ ഒന്നോ രണ്ടോ ആളുകള്‍ മാത്രമാണുണ്ടായിരുന്നത്. അവരുടെ ശ്രദ്ധയില്‍ പെടുന്നതിനു മുന്‍പു തന്നെ തീകൊളുത്തിക്കഴിഞ്ഞിരുന്നു. തീ ആളിപ്പടരുന്നത് കണ്ടാണ് ആളുകള്‍ ഓടിക്കൂടിയത്. എന്തു ചെയ്യണമെന്നറിയാതെ പകച്ചു പോയവര്‍ ആത്മസംയമനം വീണ്ടെടുക്കാന്‍ അല്‍പസമയമെടുത്തു. ഉടന്‍തന്നെ വെള്ളമൊഴിച്ചും കയ്യില്‍ കിട്ടിയ സാധനങ്ങള്‍ ഉപയോഗിച്ചും തീയണച്ചു. വാഴയില വെട്ടി അതില്‍ കിടത്തി. വിവരമറിയിച്ചതനുസരിച്ച് പൊലീസും അഗ്‌നിരക്ഷാസേനയും ആംബുലന്‍സും സ്ഥലത്തെത്തി. പൊലീസ് സ്റ്റേഷന്‍ ഹൗസ് ഓഫിസര്‍ കെ.സി.സുഭാഷ് ബാബുവിന്റെ നേതൃത്വത്തില്‍ പൊലീസും നാട്ടുകാരും ചേര്‍ന്ന് ആശുപത്രിയില്‍ എത്തിച്ചെങ്കിലും ഏറെ നേരം കൃഷ്ണപ്രിയയുടെ ജീവന്‍ പിടിച്ചുനിര്‍ത്താനായില്ല.