വടകര താലൂക്ക് ഓഫിസിന് തീയിട്ടെന്ന് സംശയിക്കുന്നയാള്‍ കസ്റ്റഡിയില്‍

വടകര താലൂക്ക് ഓഫിസിന് തീയിട്ടതെന്ന് സംശയിക്കുന്ന ആന്ധ്ര സ്വദേശിയെ കസ്റ്റഡിയിലെടുത്തു. വടകര ടൗണില്‍ അലഞ്ഞുതിരിഞ്ഞു നടക്കുന്ന സതീഷാണ് പിടിയിലായത്. താലൂക്ക് ഓഫിസിന് സമീപത്തെ കെട്ടിടത്തിന്റെ ശുചിമുറിയില്‍ ഇയാള്‍ തീയിട്ടിരുന്നു. സിസിടിവി ദൃശ്യങ്ങളുടെ അടിസ്ഥാനത്തിലാണ് ഇതു കണ്ടെത്തിയത്. ഇയാള്‍ക്ക് താലൂക്ക് ഓഫിസ് തീപിടിത്തവുമായി ബന്ധമുണ്ടോ എന്നറിയാന്‍ ചോദ്യംചെയ്യും. വെള്ളിയാഴ്ച പുലര്‍ച്ചെയുണ്ടായ തീപിടിത്തത്തില്‍ വടകര താലൂക്ക് ഓഫിസ് കെട്ടിടം പൂര്‍ണമായി കത്തിനശിച്ചു. ഭൂരിഭാഗം ഫയലുകളും 45 കംപ്യൂട്ടറുകളും നശിച്ചു. കെട്ടിടത്തിന്റെ ഒരു ഭാഗം തകര്‍ന്നു വീണു. രാവിലെ അഞ്ചരയോടെ സമീപത്തെ ജയില്‍ ജീവനക്കാരാണു തീ കണ്ടത്. അതിനു മണിക്കൂറുകള്‍ക്ക് മുന്‍പു തന്നെ കെട്ടിടത്തിനുള്ളില്‍ തീ പടര്‍ന്നിരിക്കാമെന്ന് കരുതുന്നു. അഗ്‌നിരക്ഷാസേനയുടെ 10 യൂണിറ്റ് എത്തിയാണു തീയണച്ചത്. 1885ല്‍ സ്ഥാപിച്ചെന്നു കരുതുന്ന താലൂക്ക് ഓഫിസില്‍ 100 വര്‍ഷത്തിലധികം പഴക്കമുള്ള ഒട്ടേറെ ഫയലുകളുണ്ടായിരുന്നു. അവയില്‍ പലതും കത്തിനശിച്ചു. തൊട്ടടുത്തുള്ള പഴയ ട്രഷറി, സബ് റജിസ്ട്രാര്‍ ഓഫിസ്, ജയില്‍ എന്നിവയിലേക്കു തീ പടരാത്തതിനാല്‍ കൂടുതല്‍ അപകടം ഒഴിവാകുകയായിരുന്നു