‘ദുരൂഹം’, പെണ്‍കുട്ടികളുടെ വിവാഹ പ്രായം 21 ആക്കാനുള്ള നീക്കത്തിനെതിരെ പികെ ശ്രീമതി

ധൃതിപിടിച്ച് പെണ്‍കുട്ടികളുടെ വിവാഹപ്രായം 21 ആക്കാനുള്ള കേന്ദ്ര സര്‍ക്കാര്‍ നീക്കം ദുരൂഹമെന്ന് സിപിഎം കേന്ദ്ര കമ്മിറ്റി അംഗം പി കെ ശ്രീമതി . വിവാഹ പ്രായം 18 വയസ് ആയി തന്നെ നിലനിര്‍ത്തണമെന്നും പെണ്‍കുട്ടികളുടെ പോഷകാഹാര കുറവ് പരിഹരിക്കാനുള്ള നിയമവും നടപടിക്രമങ്ങളുമാണ് രാജ്യത്ത് കൊണ്ട് വരേണ്ടതെന്നും പി കെ ശ്രീമതി പറഞ്ഞു. '' വിവാഹ പ്രായം 21 ആക്കുന്നത് ദൂരവ്യാപകമായ പ്രത്യാഘാതം ഉണ്ടാക്കാവുന്ന തീരുമാനമാണ്. ബില്ലിനെ ശക്തമായി എതിര്‍ക്കുകയാണ്. ഇത്തരം തീരുമാനങ്ങള്‍ എടുക്കേണ്ടത് മഹിളാ സംഘടനകളുമായും രാഷ്ട്രീയ പാര്‍ട്ടികളുമായും ആലോചിച്ച് വേണമായിരുന്നുവെന്ന് ഓര്‍മ്മിപ്പിച്ച പികെ ശ്രീമതി, തീരുമാനത്തിന് പിന്നില്‍ ചില രാഷ്ട്രീയ ലക്ഷ്യങ്ങളും ദുരൂഹതകളുമുണ്ടെന്നും കുറ്റപ്പെടുത്തി''. അതിനിടെ, സ്ത്രീകളുടെ വിവാഹപ്രായം 21 ആക്കി ഉയര്‍ത്താനുള്ള തീരുമാനത്തെ ജനാധിപത്യ മഹിളാ അസോസിയേഷന്‍ ദേശീയ നേതൃത്വവും എതിര്‍ത്തു. കേന്ദ്ര നീക്കം വിപരീത ഫലമുണ്ടാക്കുമെന്ന് സംഘടന പ്രതികരിച്ചുവെങ്കിലും വിഷയത്തില്‍ പ്രതികരിക്കാന്‍ സംസ്ഥാന ഘടകം തയ്യാറായിട്ടില്ല. കൂടതല്‍ ചര്‍ച്ച വേണമെന്നാണ് സംസ്ഥാന നേതാക്കളുടെ നിലപാട്. സ്ത്രീകളുടെ വിവാഹപ്രായം 21 ആയി ഉയര്‍ത്താനുള്ള നീക്കത്തിനെതിരെ മുസ്ലിം ലീഗും രംഗത്തെത്തി. മുസ്ലിം വ്യക്തിനിയമത്തിലുള്ള കടന്നുകയറ്റമെന്ന് ആരോപിച്ച് പാര്‍ലമെന്റിന്റെ ഇരുസഭകളിലും മുസ്ലിം ലീഗ് നോട്ടീസ് നല്‍കി. സ്ത്രീകളുടെ വിവാഹപ്രായം 21 ആയി ഉയര്‍ത്താനുള്ള ബില്ല് അടുത്തയാഴ്ച പാര്‍ലമെന്റില്‍ എത്തിയേക്കും. വിശദ ചര്‍ച്ചയ്ക്കു ശേഷമേ ഇത് കൊണ്ടുവരാന്‍ പാടുള്ളു എന്ന ആവശ്യവുമായാണ് നാല് മുസ്ലിംലീഗ് എംപിമാര്‍ ഇന്ന് നോട്ടീസ് നല്കിയത്. ബില്ലിന് പിന്നില്‍ ഗൂഢലക്ഷ്യമെന്നും ലീഗ് ആരോപിച്ചു. എന്നാല്‍ ബില്ല് നടപ്പുസമ്മേളനത്തില്‍ അവതരിപ്പിക്കുന്ന കാര്യത്തില്‍ കേന്ദ്രം മൗനം തുടരുകയാണ്. സ്ത്രീകളുടെ വിവാഹപ്രായം 18ല്‍ നിന്ന് 21 ആക്കി ഉയര്‍ത്തണമെന്ന ശുപാര്‍ശ ജയാജയ്റ്റ്‌ലി അദ്ധ്യക്ഷയായ വിദഗ്ധ സമിതി നല്കിയിരുന്നു. പ്രധാനമന്ത്രി നരേന്ദ്ര മോദി ഇക്കാര്യം ചെങ്കോട്ടയിലെ പ്രസംഗത്തില്‍ പ്രഖ്യാപിച്ചു. നിയമനിര്‍മ്മാണത്തിനുള്ള നടപടിക്കാണ് മന്ത്രിസഭ തുടക്കം കുറിച്ചിരിക്കുന്നത്. ശൈവവിവാഹ നിരോധന നിയമം ആദ്യം ഭേദഗതി ചെയ്യും. ഹിന്ദു വിവാഹ നിയമം ഉള്‍പ്പടെ ബന്ധപ്പെട്ട നിയമങ്ങളും മാറ്റേണ്ടി വരും.