കോഴിക്കോട് യുവതിയെ പെട്രോളൊഴിച്ച് തീകൊളുത്തിയ യുവാവ് സ്വയം തീകൊളുത്തി

കോഴിക്കോട് യുവതിയെ പെട്രോള്‍ ഒഴിച്ചു തീകൊളുത്തിയശേഷം യുവാവ് ജീവനൊടുക്കാന്‍ ശ്രമിച്ചു. തിക്കോടി കാട്ടുവയല്‍ മനോജന്റെ മകള്‍ സിന്ദൂരി എന്ന കൃഷ്ണപ്രിയ (22) യെയാണ് വലിയ മഠത്തില്‍ മോഹനന്റെ മകന്‍ നന്ദഗോപന്‍ (28) പെട്രോള്‍ ഒഴിച്ചു തീ കൊളുത്തിയത്. ബാക്കി പെട്രോള്‍ സ്വന്തം ശരീരത്തിലേക്ക് ഒഴിച്ച് തീകൊളുത്തുകയായിരുന്നു. ഗുരുതരമായി പൊള്ളലേറ്റ് ഇരുവരെയും കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇന്നു രാവിലെ 10 മണിക്ക് തിക്കോടി ഗ്രാമ പഞ്ചായത്ത് ഓഫിസിനു മുന്‍പിലാണ് സംഭവം. ഇരുവരും സംസാരിച്ചു കൊണ്ടിരിക്കുന്നതിനിടെ, നന്ദഗോപന്‍ കയ്യില്‍ കരുതിയ കുപ്പിയില്‍നിന്നും പെട്രോള്‍ കൃഷ്ണപ്രിയയുടെ ശരീരത്തില്‍ ഒഴിച്ചു. തുടര്‍ന്ന് തന്റെ ശരീരത്തിലേക്കും ഒഴിച്ചു തീ കൊളുത്തുകയായിരുന്നു. പഞ്ചായത്ത് ഓഫിസിലെ താല്‍ക്കാലിക ജീവനക്കാരിയാണ് കൃഷ്ണപ്രിയ. ഇരുവരും നേരത്തേ പരിചയക്കാരാണ്.