വ്യവസായ സൗഹൃദ സംസ്ഥാനമായി കേരളം പ്രവര്‍ത്തിക്കുമ്പോഴും ചിലര്‍ക്ക് ദ്രോഹമനസ്- മുഖ്യമന്ത്രി

വ്യവസായ സൗഹൃദ സംസ്ഥാനമായി കേരളം പ്രവര്‍ത്തിക്കുമ്പോഴും ചിലര്‍ ദ്രോഹമനസോടെ പ്രവര്‍ത്തിക്കുന്നുവെന്ന് മുഖ്യമന്ത്രി പിണറായി വിജയന്‍. ഇത് നാടിന് ശാപമാണ്. സംരംഭങ്ങള്‍ ഉടക്കുവെക്കാമെന്നാണ് അവര്‍ ആലോചിക്കുന്നത്. ഇതിനായി പുതിയ വിദ്യകള്‍ സ്വീകരിക്കുന്നുവെന്നും മുഖ്യമന്ത്രി പറഞ്ഞു. തിരുവനന്തപുരത്ത് ലുലു മാള്‍ ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി. സംരംഭങ്ങള്‍ക്ക് ഉടക്കുവെക്കാനായി രാഷ്ട്രപതി മുതല്‍ പഞ്ചായത്ത് വരെ ഉള്ള അധികാര സ്ഥാനങ്ങള്‍ക്ക് പരാതി അയക്കുന്നു. വ്യവസായം നടത്താന്‍ വരുന്നവര്‍ അവരെ കണ്ട് തീര്‍പ്പുണ്ടാക്കുകയാണ് ഉദ്ദേശം. ഇവര്‍ നാടിന് എതിരാണ്. ഇവര്‍ പൊതുതാല്‍പര്യമെന്ന പേരിലാണ് എതിര് നില്‍ക്കുന്നത്. നാളെയെ ലക്ഷ്യമിട്ട് ജ്ഞാനസമൂഹം സൃഷ്ടിക്കാന്‍ ശ്രമിക്കുമ്പോള്‍ ഇത്തരക്കാരെ തിരിച്ചറിയണമെന്നും മുഖ്യമന്ത്രി പറഞ്ഞു. 50 കോടി രൂപയിലധികം നിക്ഷേപമുള്ള സംരംഭങ്ങള്‍ക്ക് അപേക്ഷിച്ചാല്‍ 7 ദിവസത്തിനകം ലൈസന്‍സ് നല്‍കുന്ന സംവിധാനം നടപ്പാക്കാനായെന്നും മുഖ്യമന്ത്രി പറഞ്ഞു. പരിശോധനകള്‍ ഉണ്ടാകുന്ന തലവേദന ഒഴിവാക്കാന്‍ കമ്പ്യൂട്ടറൈസ്ഡ് സംവിധാനം വന്നതോടെ 3200 കോടി രൂപയുടെ നിക്ഷേപമെത്തിയെന്നും അദ്ദേഹം ചൂണ്ടിക്കാണിച്ചു.