ഇന്തോനീഷ്യയില്‍ വന്‍ ഭൂചലനം; സുനാമി മുന്നറിയിപ്പ് നല്‍കി

ഫ്ലോറസ് ദ്വീപിന് സമീപം ശക്തമായ ഭൂചലനത്തെ തുടര്‍ന്ന് സുനാമി മുന്നറിയിപ്പ്. ഇന്തോനീഷ്യയിലെ ഫ്ലോറസ് ദ്വീപില്‍ വന്‍ ഭൂചലനം റിപ്പോര്‍ട്ട് ചെയ്ത പശ്ചാത്തലത്തില്‍ സുനാമി മുന്നറിയിപ്പ്. റിക്ടര്‍ സ്‌കെയിലില്‍ 7.7 തീവ്രതയിലാണ് ഭൂചലനം ഉണ്ടായത്. തുടര്‍ന്ന് ഫ്ലോറസ് സമൂദ്ര തീരത്ത് ജാഗ്രത നിര്‍ദ്ദേശം പുറപ്പെടുവിച്ചു. മൗമേറ നഗരത്തിന് 100 കിലോമീറ്റര്‍ വടക്ക് ഫ്ലോറസ് കടലിലാണ് 18.5 കിലോമീറ്റര്‍ ആഴത്തില്‍ ഭൂചലനം ഉണ്ടായതായി യുഎസ് ജിയോളജിക്കല്‍ സര്‍വേ അറിയിച്ചു. ഈ സാഹചര്യത്തില്‍ ഉയര്‍ന്ന തീരമാലയ്ക്ക് സാധ്യതയുണ്ടെന്നാണ് മുന്നറിയിപ്പ്. കഴിഞ്ഞ മെയില്‍ സുമാത്ര ദ്വീപിന്റെ വടക്കുപടിഞ്ഞാറന്‍ തീരത്ത് 6.6 തീവ്രത രേഖപ്പെടുത്തിയ ഭൂചലനം ഉണ്ടായതായി ജര്‍മ്മന്‍ റിസര്‍ച്ച് സെന്റര്‍ ഫോര്‍ ജിയോസയന്‍സസ് അറിയിച്ചിരുന്നു. റിക്ടര്‍ സ്‌കെയിലില്‍ 7.7 തീവ്രത രേഖപ്പെടുത്തിയ സാഹചര്യത്തിലാണ് ഫ്ലോറസ് തീരത്ത് ജാഗ്രത നിര്‍ദ്ദേശം പുറപ്പെടുവിച്ചത്. ഇന്തോനേഷ്യയില്‍ അവസാനമായി ഒരു ഭൂകമ്പം സുനാമിക്ക് കാരണമായത് 2004 ലാണ്. 2004 ഡിസംബര്‍ 26 ന് വടക്കുപടിഞ്ഞാറന്‍ സുമാത്ര തീരത്ത് 9.1 തീവ്രത രേഖപ്പെടുത്തിയ ഭൂചലനത്തെ തുടര്‍ന്ന് ഉണ്ടായ സുനാമി ഇന്തോനേഷ്യ, ശ്രീലങ്ക, ഇന്ത്യ, തായ്ലന്‍ഡ് എന്നിവിടങ്ങളില്‍ 230,000ത്തിലധികം ആളുകളുടെ മരണത്തിന് കാരണമായിരുന്നു.