കാമുകി ഉറങ്ങുമ്പോള്‍ ഫേസ് അണ്‍ലോക്ക് ഉപയോഗിച്ച് ഫോണ്‍ തുറന്ന് യുവാവ് 18 ലക്ഷം തട്ടി; തടവ്

കാമുകി ഉറങ്ങുമ്പോള്‍ ഫേസ് അണ്‍ലോക്ക് ഉപയോഗിച്ച് ഫോണ്‍ തുറന്ന് 18 ലക്ഷം രൂപ തട്ടിയെടുത്ത കേസില്‍ യുവാവിന് മൂന്നര വര്‍ഷം തടവ് ശിക്ഷ. ചൈനയിലെ നാംനിയിലാണ് സംഭവം. കാമുകി ഉറങ്ങി കിടക്കുമ്പോള്‍ ഫേസ് അണ്‍ലോക്കിന്റെ സാധ്യത ഉപയോഗിച്ച് പ്രതി അലിപേ അക്കൗണ്ട് വഴി പണം തട്ടിയെടുക്കുകയായിരുന്നു. വന്‍ കട ബാധ്യതയുണ്ടായിരുന്ന ഇയാള്‍ തട്ടിയെടുത്ത പണം വിനിയോഗിച്ചത് ചൂതാട്ടത്തിന് വേണ്ടിയാണെന്നും തെളിഞ്ഞിട്ടുണ്ട്. വാവെയുടെ ഫോണായിരുന്നു യുവതി ഉപയോഗിച്ചത്. ഇവര്‍ ഉറങ്ങി കിടക്കുമ്പോള്‍ വിരലളടയാളം ഉപയോഗിച്ച് ഫോണ്‍ അണ്‍ലോക്ക് ചെയ്ത് പ്രതി ഫേസ്അണ്‍ലോക്ക് വഴി അലിപേ അക്കൗണ്ടില്‍ പ്രവേശിച്ചു. ശേഷം പാസ്വേര്‍ഡ് അതിവിദ്ഗദ്ധമായി മാറ്റി. പിന്നീട് 150,000 യുവാന്‍ (ഏകദേശം 18 ലക്ഷം ഇന്ത്യന്‍ രൂപ) സ്വന്തം അക്കൗണ്ടിലേക്ക് ട്രാന്‍സ്ഫര്‍ ചെയ്തു. കേസില്‍ യുവാവ് കുറ്റവാളിയാണെന്ന് വിലയിരുത്തിയ കോടതി ഫോണുകള്‍ പോലുള്ള ഇലക്ട്രോണിക് ഉപകരണങ്ങളുടെ സുരക്ഷാ പോരായ്മകളില്‍ ആശങ്ക രേഖപ്പെടുത്തി. വന്‍ തോതില്‍ ചൂതാട്ട കടങ്ങള്‍ ഉണ്ടായിരുന്ന പ്രതി കാമുകിയോട് പണം തന്റെ അക്കൗണ്ടിലേക്ക് മാറ്റിയ കാര്യം പറഞ്ഞിരുന്നില്ല. പണം നഷ്ടപ്പെട്ട കാര്യം യുവതി മനസിലാക്കിയതിന് പിന്നാലെ ഇവര്‍ പൊലീസിനെ സമീപിക്കുകയും ചെയ്തു. ഇരുവരും ഇതോടെ പിരിയുകയും ചെയ്തു. ചൂതാട്ട കടങ്ങള്‍ യുവാവിനെ നിരാശനാക്കിയിരുന്നെന്നും ഇതാണ് തട്ടിപ്പിലേക്ക് പ്രേരിപ്പിച്ചതെന്നും അന്വേഷണത്തില്‍ വ്യക്തമായിരുന്നു. അതേസമയം ഫോണുകളില്‍ ഫേസ് ഐഡി തട്ടിപ്പുകള്‍ വര്‍ധിക്കുന്നതില്‍ കോടതി ആശങ്ക രേഖപ്പെടുത്തി. കുറ്റവാളികള്‍ നുഴഞ്ഞു കയറുന്ന പല മാര്‍ഗങ്ങളെയും തകര്‍ക്കാന്‍ നമുക്ക് സാധിക്കുന്നുണ്ടെങ്കിലും ഇതെല്ലാം പൂര്‍ണ തലത്തില്‍ വിജയിക്കുന്നില്ലെന്ന് കോടതി വിലയിരുത്തി. നേരത്തെ ആപ്പിള്‍ ഫേസ് ഐഡി ഫീച്ചര്‍ പുറത്തിറക്കിയപ്പോഴും ഇത്തരത്തില്‍ സുരക്ഷാ ആശങ്കകളുണ്ടായിരുന്നു.