ഇന്ന് രണ്ട് ജില്ലാ സമ്മേളനങ്ങള്‍

സിപിഎം വയനാട് ജില്ലാ സമ്മേളനം ഇന്ന് വൈത്തിരിയില്‍ തുടങ്ങും. പ്രതിനിധി സമ്മേളനം പോളിറ്റ് ബ്യൂറോ അംഗം എം.എ. ബേബി ഉദ്ഘാടനം ചെയ്യും. ജില്ലയിലെ വിവിധ ഏരിയാ സമ്മേളനങ്ങളില്‍ മത്സരം നടന്നതില്‍ അസ്വാഭാവികതയില്ലെന്ന് ജില്ലാ സെക്രട്ടറി പി. ഗഗാറിന്‍ പറഞ്ഞു. 11,286 പാര്‍ട്ടി അംഗങ്ങളെ പ്രതിനിധീകരിച്ച് 125 പേരാണ് സിപിഎം വയനാട് ജില്ലാ സമ്മേളനത്തില്‍ പങ്കെടുക്കുക. ഇവര്‍ക്കൊപ്പം 25 ജില്ലാ കമ്മറ്റി അംഗങ്ങളും സമ്മേളനത്തിലുണ്ടാകും. പോളിറ്റ് ബ്യൂറോ അംഗം എം.എ. ബേബിക്ക് പുറമെ 6 കേന്ദ്ര കമ്മറ്റി അംഗങ്ങളും 3 ദിവസത്തെ സമ്മേളനത്തില്‍ പങ്കെടുക്കും. വയനാട്ടിലെ 8 ഏരിയാ കമ്മറ്റികളിലേക്കും ആരോഗ്യപരമായ മത്സരം നടന്നതായി ജില്ലാ സെക്രട്ടറി പി. ഗഗാറിന്‍ പറഞ്ഞു. കല്‍പ്പറ്റ, ബത്തേരി നിയോജക മണ്ഡലങ്ങളിലുണ്ടായ തോല്‍വിയും പിന്നീട് പാര്‍ട്ടിയിലുണ്ടായ നടപടികളും ജില്ല സമ്മേളനത്തില്‍ ചൂടേറിയ ചര്‍ച്ച വിഷയമാകും. മൂന്നു ദിവസം നീണ്ടു നില്‍ക്കുന്ന സിപിഎം എറണാകുളം ജില്ലാ സമ്മേളനവും ഇന്നു തുടങ്ങും. കളമശേരിയില്‍ രാവിലെ പത്തിന് മുഖ്യമന്ത്രി പിണറായി വിജയന്‍ പ്രതിനിധി സമ്മേളനം ഉദ്ഘാടനം ചെയ്യും. ജില്ലയിലെ 41618 പാര്‍ട്ടി അംഗങ്ങളെ പ്രതിനിധീകരിച്ച് വിവിധ ഏരിയാ സമ്മേളനങ്ങളില്‍ നിന്നും തെരഞ്ഞെടുക്കപ്പെട്ട 180 പ്രതിനിധികളും നിലവിലുള്ള ജില്ലാ കമ്മറ്റി യിലെ 39 അംഗങ്ങളും സമ്മേളനത്തില്‍ പങ്കെടുക്കും. നിയമസഭ തെരഞ്ഞെടുപ്പില്‍ ജില്ലയില്‍ മുന്നണിക്കുണ്ടായ തിരിച്ചടി പ്രധാന ചര്‍ച്ചയാകും. കൂടുതല്‍ പുതുമുഖങ്ങള്‍ ഇത്തവണ ജില്ലാ കമ്മിറ്റിയിലേക്ക് എത്തുമെന്നാണ് കരുതുന്നത്. 16 ന് വൈകിട്ട് 5ന് സമാപന സമ്മേളനം മുഖ്യമന്ത്രി ഉദ്ഘാടനം ചെയ്യും.