കാമുകനെ തേടി ടൂറിസ്റ്റ് വിസയിലെത്തി; ഇന്റര്‍പോള്‍ നോട്ടീസ്, സ്വീഡിഷ് പെണ്‍കുട്ടിയെ കണ്ടെത്തി

മുംബൈ: സാമൂഹിക മാധ്യമംവഴി സൗഹൃദംസ്ഥാപിച്ച പതിനെട്ടുകാരനൊപ്പം ജീവിക്കാന്‍ സ്വീഡനില്‍നിന്ന് ഒളിച്ചോടിപ്പോന്ന പതിനാറുകാരിയെ മുംബൈ പോലീസ് രക്ഷിതാക്കളെ ഏല്‍പിച്ചു.സ്വീഡനിലെ ഇന്ത്യന്‍ വംശജരുടെ മകളെ നവംബര്‍ 27-നാണ് കാണാതായത്. മുംബൈയിലുള്ള യുവാവുമായി മകള്‍ക്ക് ഇന്‍സ്റ്റഗ്രാം വഴി സൗഹൃദമുള്ളതായി അറിയാവുന്ന വീട്ടുകാര്‍ വിവരം പോലീസിനെ അറിയിച്ചു. സ്വീഡിഷ് അന്വേഷണ ഏജന്‍സി ഇന്റര്‍പോള്‍ വഴി കുട്ടിയെ കാണാനില്ലെന്നു കാണിച്ചുള്ള യെല്ലോ കോര്‍ണര്‍ നോട്ടീസ് പുറപ്പെടുവിച്ചു. സി.ബി.ഐ. വഴി ഡിസംബര്‍ നാലിന് മുംബൈ പോലീസിന് ജാഗ്രതാ നിര്‍ദേശം ലഭിച്ചു. മുംബൈയിലുള്ള യുവാവിന്റെ സുഹൃത്തിന്റെ ഇന്‍സ്റ്റഗ്രാം അക്കൗണ്ട് നിരീക്ഷിച്ച പോലീസിന് പെണ്‍കുട്ടി ഇവിടെയുണ്ടെന്ന സൂചന ലഭിച്ചു. യുവാവിനെ കണ്ടെത്തി ചോദ്യം ചെയ്തപ്പോള്‍ ട്രോംബെയിലെ ചീറ്റാ ക്യാമ്പ് മേഖലയിലെ ഫ്‌ളാറ്റില്‍ പെണ്‍കുട്ടിയുണ്ടെന്ന് വിവരം കിട്ടി. പെണ്‍കുട്ടിയെ ഡോംഗ്രിയിലെ ശിശുക്ഷേമ സമിതി മന്ദിരത്തിലേക്ക് മാറ്റി. ഡല്‍ഹിയിലെ സ്വീഡിഷ് എംബസി വഴി അച്ഛനെ വിവരം അറിയിച്ചു. വെള്ളിയാഴ്ച അച്ഛന്‍ മുംബൈയിലെത്തി മകളെ കൊണ്ടുപോവുകയും ചെയ്തു. ഏതാനും മാസം മുമ്പ് ഇന്‍സ്റ്റഗ്രാം വഴി പരിചയപ്പെട്ട യുവാവിനൊപ്പം കഴിയാനാണ് പെണ്‍കുട്ടി ഇന്ത്യയിലെത്തിയതെന്ന് പോലീസ് പറഞ്ഞു. വീട്ടുകാരറിയാതെ ആറു മാസത്തെ ടൂറിസ്റ്റ് വിസയെടുത്തായിരുന്നു വിമാന യാത്ര. സ്വീഡനിലെ നിയമമനുസരിച്ച് 15 വയസ്സ് കഴിഞ്ഞവര്‍ക്ക് സ്വന്തം ഇഷ്ടപ്രകാരം തനിച്ച് വിദേശയാത്ര നടത്താം. മുംബൈയിലെത്തി കൂട്ടുകാരനെ കണ്ടെങ്കിലും അവന്റെ മാതാപിതാക്കള്‍ പെണ്‍കുട്ടിയെ വീട്ടില്‍ കഴിയാന്‍ അനുവദിച്ചില്ല. ബന്ധുവായ ഒരു യുവതിയ്ക്കൊപ്പം ട്രോംബെയിലെ ഫ്‌ളാറ്റില്‍ താമസിപ്പിച്ചു. യുവാവ് തെറ്റൊന്നും ചെയ്തിട്ടില്ലെന്നും അവനെതിരേ പരാതി നല്‍കുന്നില്ലെന്നും പെണ്‍കുട്ടിയുടെ അച്ഛന്‍ പറഞ്ഞു. എന്‍ജിനിയറിങ് വിദ്യാര്‍ഥിയായ യുവാവിന് പെണ്‍കുട്ടിയെ ഉപദ്രവിക്കുകയെന്ന ഉദ്ദേശ്യമൊന്നുമില്ലായിരുന്നുവെന്ന് ബോധ്യമായതുകൊണ്ട് കേസെടുത്തിട്ടില്ലെന്ന് മുംബൈ ക്രൈംബ്രാഞ്ചിലെ ഓഫീസര്‍ രവീന്ദ്ര സാലുംഖേ പറഞ്ഞു.