കൊച്ചിയിലെത്തിയ റഷ്യന്‍ സ്വദേശിക്ക് കൊവിഡ്; സാമ്പിള്‍ ഒമിക്രോണ്‍ പരിശോധനയ്ക്കയച്ചു

നെടുമ്പാശേരി രാജ്യാന്തര വിമാന താവളത്തില്‍ വന്നിറങ്ങിയ റഷ്യന്‍ സ്വദേശിക്ക് കൊവിഡ് . ഇന്‍ഡിഗോ വിമാനത്തില്‍ വന്നിറങ്ങിയ 25 കാരനാണ് വിമാന താവളത്തില്‍ നടത്തിയ റാപിഡ് പിസിആര്‍ പരിശോധനയില്‍ കൊവിഡ് സ്ഥിരീകരിച്ചത്. ബ്രിട്ടനില്‍ നിന്നാണ് ഇയാളെത്തിയത്. ഇയാളെ അമ്പലമുകളിലെ ഗവ. കൊവിഡ് ചികിത്സ കേന്ദ്രത്തിലേക്ക് മാറ്റി. ഒമിക്രോണാണോയെന്നറിയാന്‍ പരിശോധന നടത്തും. ഒമിക്രോണ്‍ സംശയിക്കപ്പെട്ടിട്ടുള്ള 30 ലേറെ രാജ്യങ്ങളില്‍ നിന്നുള്ള എല്ലാ യാത്രക്കാര്‍ക്കും കൊവിഡ് പരിശോധന നടത്തുന്നുണ്ട്. ഇതിനിടെ ഇക്കഴിഞ്ഞ 29 ന് വിമാന താവളത്തില്‍ വന്നിറങ്ങിയ ഏഴ് റഷ്യന്‍ സ്വദേശികള്‍ക്ക് കൊവിഡ് പരിശോധന നടത്തിയില്ലെന്ന തരത്തിലുള്ള വാര്‍ത്ത തെറ്റിദ്ധാരണപരത്തുന്നതാണെന്ന് എയര്‍പോര്‍ട്ട് ഡയറക്ടര്‍ എസികെ.നായര്‍ വ്യക്തമാക്കി. ഡിസംബര്‍ 1 ന് പുലര്‍ച്ചെ മുതല്‍ മാത്രമാണ് പരിശോധന നടത്താന്‍ കേന്ദ്ര ആരോഗ്യമന്ത്രാലയം നിര്‍ദ്ദേശം നല്‍കിയതെന്നും അദ്ദേഹം പറഞ്ഞു.