ലൈവ് റിപ്പോര്‍ട്ടിംഗിനിടെ അവതാരകയെ കയറിപ്പിടിച്ച് യുവാവ്; നടപടി

ഇറ്റലിയില്‍ ഫുട്‌ബോള്‍ സ്റ്റേഡിയത്തിന് പുറത്ത് ലൈവ് റിപ്പോര്‍ട്ടിംഗ് നടത്തുന്നതിനിടെ വനിതാ റിപ്പോര്‍ട്ടറെ കയറിപ്പിടിച്ച യുവാവിനെതിരെ നടപടി. പ്രതിയെ മൂന്ന് വര്‍ഷത്തേക്ക് സ്റ്റേഡിയങ്ങളില്‍ പ്രവേശിക്കുന്നത് വിലക്കി ഇറ്റാലിയന്‍ പൊലീസ് ഉത്തരവിറക്കി. കാര്‍ലൊ കസ്റ്റെലനി സ്റ്റേഡിയത്തിലാണ് സംഭവം നടന്നത്. ഗ്രേറ്റ ബെകക്ലിയ എന്ന മാധ്യമപ്രവര്‍ത്തകയ്ക്കാണ് ദുരനുഭവമുണ്ടായത്. ശനിയാഴ്ച എംപോളിയയോട് ഫിയോറന്റീന 2-1 ന് തോറ്റ മത്സരത്തിനു ശേഷം കാണികള്‍ സ്റ്റേഡിയത്തിനു പുറത്തേക്ക് വരുന്ന വേളയില്‍ റിപ്പോര്‍ട്ട് ചെയ്യുകയായിരുന്നു ഗ്രേറ്റ. ഇതിനിടയില്‍ അരികിലൂടെ പോയ യുവാവ് ഗ്രേറ്റയുടെ പിന്‍ഭാഗത്ത് തട്ടി നടന്നു പോയി. നിങ്ങള്‍ക്കിന് ചെയ്യാന്‍ പറ്റില്ല എന്ന് റിപ്പോര്‍ട്ടര്‍ അയാളോട് പറയുന്നതിനിടെ മറ്റാെരു യുവാവ് ക്യാമറയുടെ മുന്നിലെത്തി അസഭ്യ ആഗ്യം കാണിക്കുകയും ചെയ്തു. ലൈവായി സംപ്രേഷണം ചെയ്യപ്പെട്ട ഈ ദൃശ്യങ്ങള്‍ വ്യാപകമായി പ്രചരിക്കപ്പെട്ടതോടെ സോഷ്യല്‍ മീഡിയയില്‍ വ്യാപക പ്രതിഷേധമുയര്‍ന്നു. ഇതിനു പിന്നാലെയാണ് റിപ്പോര്‍ട്ടറോട് അപമര്യാദയായി പെരുമാറിയ യുവാവിനെതിരെ പൊലീസ് നടപടിയെടുത്തത്. പ്രതിയായ ആന്‍ഡ്രിയ സെരനി എന്ന യുവാവ് സംഭവത്തില്‍ മാപ്പ് പറഞ്ഞു. തന്റെ ടീം തോറ്റതിന്റെ ദേഷ്യത്തിലുണ്ടായ പെരുമാറ്റമാണെന്നും അതില്‍ ക്ഷമ ചോദിക്കുന്നെന്നും താന്‍ റിപ്പോര്‍ട്ടറെ നേരിട്ട് കാണാന്‍ തയ്യാറാണെന്നും ഇയാള്‍ പറഞ്ഞു. എന്നാല്‍ തന്നെ ഒരു ക്രിമിനലായ ചിത്രീകരിക്കരുതെന്നും ഇയാള്‍ പറഞ്ഞു. എന്നാല്‍ മാപ്പ് കൊണ്ട് കാര്യമില്ലെന്നും നടപടി വേണമെന്നും മാധ്യമപ്രവര്‍ത്തക വ്യക്തമാക്കി.