ഒമിക്രോണ്‍ പടര്‍ന്നാല്‍ പ്രത്യാഘാതം ഗുരുതരം: ലോകാരോഗ്യ സംഘടന

കോവിഡിന്റെ ഒമിക്രോണ്‍ വകഭേദം ഉയര്‍ന്ന അപകട സാധ്യതയുള്ളതാകാമെന്നു ലോകാരോഗ്യ സംഘടനയുടെ മുന്നറിയിപ്പ്. ഒമിക്രോണ്‍ എത്രത്തോളം ഗുരുതരമാകാമെന്നതില്‍ അഭ്യൂഹങ്ങള്‍ നിറഞ്ഞ സാഹചര്യത്തിലാണു ലോകാരോഗ്യ സംഘടന നിലപാടു വ്യക്തമാക്കിയത്. ഒമിക്രോണ്‍ പടര്‍ന്നു പിടിക്കുകയാണെങ്കില്‍ അതിന്റെ പ്രത്യാഘാതം അതീവ ഗുരുതരമായിരിക്കുമെന്നു ലോകാരോഗ്യ സംഘടന പുറത്തിറക്കിയ കുറിപ്പില്‍ പറയുന്നു. ഒരാഴ്ച മുന്‍പാണ് കോവിഡിന്റെ പുതിയ വകഭേദമായ ബി.1.1 529 നെ ദക്ഷിണാഫ്രിക്കയില്‍ കണ്ടെത്തിയത്. ഇതിന് ഒമിക്രോണ്‍ എന്ന പേരും പിന്നീടു നല്‍കി. ഒമിക്രോണ്‍ സംബന്ധിച്ചു പഠനങ്ങള്‍ പൂര്‍ത്തിയാക്കാന്‍ ഇനിയും സമയമെടുക്കുമെന്നാണു ലോകാരോഗ്യ സംഘടന പറയുന്നത്. വകഭേദത്തിന്റെ തീവ്രത, വ്യാപനശേഷി തുടങ്ങിയ കാര്യങ്ങളില്‍ പഠനത്തിലൂടെ മാത്രമേ കൃത്യത ലഭിക്കൂ.ഒമിക്രോണ്‍ വകഭേദം അപകടകാരിയാണെന്നതിന് ഇതുവരെ തെളിവു ലഭിച്ചിട്ടില്ലെന്ന് ഡബ്ല്യുഎച്ച്ഒ നേരത്തേ പ്രതികരിച്ചിരുന്നു. ദക്ഷിണാഫ്രിക്കയില്‍ ഒമിക്രോണ്‍ സ്ഥിരീകരിച്ച സാഹചര്യത്തില്‍ ലോകരാജ്യങ്ങള്‍ പ്രതിരോധ നടപടികള്‍ ശക്തമാക്കുകയാണ്. പല രാജ്യങ്ങളും ആഫ്രിക്കയില്‍നിന്നുള്ള യാത്രക്കാര്‍ക്കു വിലക്കേര്‍പ്പെടുത്തി. ഇന്ത്യയും പരിശോധന കര്‍ശനമാക്കിയിട്ടുണ്ട്.