‘ഭര്‍തൃവീട്ടില്‍ മരിച്ച മകള്‍ക്ക് നീതി വേണം’, ഫര്‍സാന തൂങ്ങിമരിച്ച സംഭവത്തില്‍ കുടുംബം

ഭര്‍തൃവീട്ടില്‍ മരിച്ച മകളുടെ മരണത്തില്‍ നീതി തേടി വയനാട്ടിലെ ഒരു കുടുംബം. തമിഴ്‌നാട്ടിലെ ഗൂഡലൂരില്‍ വെച്ച് ഭര്‍ത്താവിന്റെ പീഡനം മൂലമാണ് മകള്‍ മരിച്ചതെന്നാണ് പിതാവിന്റെ ആരോപണം. തമിഴ്‌നാട് പോലീസുമായി ഒത്തുകളിച്ച് മകളുടെ മരണം ആത്മഹത്യയാക്കി മാറ്റിയെന്നാണ് പരാതി. നാല് വര്‍ഷം മുന്‍പാണ് വയനാട്ടുകാരായ അബ്ദുല്‍ സമദും ഫര്‍സാനയും തമ്മില്‍ വിവാഹിതരായത്. ഗൂഡലൂരില്‍ മൊബൈല്‍ വ്യാപാരസ്ഥാപനം തുടങ്ങിയ അബ്ദുള്‍ സമദ് പിന്നീട് കുടുംബവുമൊത്ത് ഗൂഡലൂരിലേക്ക് താമസം മാറി. 2020 ജൂണ്‍ പതിനെട്ടിനാണ് മകള്‍ തൂങ്ങി മരിച്ചെന്ന് അറിയിച്ച് പിതാവായ അബ്ദുല്ലയ്ക്ക് ഫോണ്‍ വരുന്നത്. തുടക്കത്തില്‍ ദുരൂഹത ഉന്നയിച്ച പൊലീസ് തന്നെ പിന്നീട് മലക്കം മറിഞ്ഞെന്നാണ് ഈ പിതാവിന്റെ പരാതി. മൃതദേഹം കാണാന്‍ പോലും വൈകിയാണ് തന്നെ അനുവദിച്ചതെന്ന് അബ്ദുല്ല ആരോപിക്കുന്നു. ഫര്‍സാനയെ കെട്ടിത്തൂങ്ങിയ നിലയില്‍ മറ്റാരും കണ്ടിട്ടില്ല. മകളുടെ പോസ്റ്റ്‌മോര്‍ട്ടം റിപ്പോര്‍ട്ട് ലഭിക്കാന്‍ പോലും പതിനൊന്ന് മാസമെടുത്തു. മരണസമയം ഫര്‍സാനക്ക് പരുക്കേറ്റിരുന്നതായും, മരുമകന്റെ രാഷ്ട്രീയ സ്വാധീനത്തില്‍ കേസ് അട്ടിമറിച്ചെന്നുമാണ് പരാതി. മകളുടെ മരണത്തിലെ ദൂരൂഹത അകറ്റണമെന്ന ആവശ്യവുമായി നീലഗിരി ജില്ലാ കളക്ടര്‍ക്കും പോലീസ് മേധാവിക്കും പരാതി നല്‍കിയെങ്കിലും നടപടി ഉണ്ടായില്ല. സിബിഐ അന്വേഷണം ആവശ്യപ്പെട്ട് മദ്രാസ് ഹൈക്കോടതിയെ സമീപിച്ചിരിക്കുകയാണ് ഫര്‍സാനയുടെ കുടുംബം. എന്നാല്‍ ആരോപണങ്ങള്‍ തള്ളിയ അബ്ദുള്‍ സമദ് പരാതി വ്യാജമാണെന്ന് പ്രതികരിച്ചു. രാഷ്ട്രീയ സ്വാധീനമുള്ള വ്യക്തിയല്ല താന്‍. ഫര്‍സാനയുടേത് ആത്മഹത്യ തന്നെയാണ്. ഏത് അന്വേഷണവും നേരിടാന്‍ താന്‍ തയ്യാറണെന്നും അബ്ദുള്‍ സമദ് പറഞ്ഞു.