കുതിരാന്‍ തുരങ്കത്തില്‍ ഇരുവശത്തേക്കും വാഹനങ്ങള്‍ കടത്തിവിടാന്‍ ട്രെയല്‍ റണ്‍ തുടങ്ങി

കുതിരാന്‍ തുരങ്കത്തില്‍ ഇരുവശത്തോട്ടും വാഹനങ്ങള്‍ കടത്തിവിടാനുള്ള ട്രയല്‍ റണ്‍ തുടങ്ങി. രണ്ടാം തുരങ്കം പൂര്‍ത്തീകരിക്കുന്നതിന്റെ ഭാഗമായാണ് പുതിയ ക്രമീകരണം. ട്രയല്‍ റണ്‍ വിജയമായാല്‍ രണ്ടു ദിശയിലേയ്ക്കും വാഹനങ്ങള്‍ കടത്തിവിടുന്നത് തുടരും.പാലക്കാട് നിന്ന് തൃശൂരിലേക്കുളള ഒന്നാം തുരങ്കത്തിലൂടെ നിലവില്‍ ഒറ്റവരിയാണ് ഗതാഗതം. ഇനി മുതല്‍ പാലക്കാട് ഭാഗത്തേയ്ക്കും വാഹനങ്ങള്‍ കടത്തിവിടും. ഇതിനായി വഴുക്കുംപാറ മുതല്‍ റോഡിന് നടുവില്‍ തുരങ്കത്തിനകത്തും പുറത്തുമായി 3.2 കിലോമീറ്റര്‍ ദൂരം ബാരിക്കേഡുകള്‍ സ്ഥാപിച്ചു. തുരങ്കത്തില്‍ വാഹനങ്ങളുടെ വേഗ നിയന്ത്രണം കര്‍ശനമാക്കും. തുരങ്കത്തിന് ഇരുവശവും ആംബുലന്‍സ് സംവിധാനവും ക്രെയിന്‍ സംവിധാനവും ഏര്‍പ്പെടുത്തിയിട്ടുണ്ട്. നിര്‍മ്മാണം നടക്കുന്ന റോഡിലും, തുരങ്കത്തിനകത്തും ഒരു കാരണവശാലും വാഹനങ്ങളുടെ ഓവര്‍ടേക്കിങ്ങ് അനുവദിക്കുകയില്ലെന്ന് പൊലീസ് അറിയിച്ചു.കുതിരാന്‍ തുരങ്ക നിര്‍മ്മാണ സ്ഥലത്ത് 24 മണിക്കൂറും പ്രവര്‍ത്തിക്കുന്ന പൊലീസ് കണ്‍ട്രോള്‍ റൂം സജ്ജമായി. മുഴുവന്‍ സമയവും തുരങ്കത്തിനകത്തും റോഡുകളിലും പൊലീസ് ഉദ്യോഗസ്ഥര്‍ ഡ്യൂട്ടിയിലുണ്ടാകും.