ഉത്സവങ്ങളില്‍ കൂടുതല്‍ ആനകളെ എഴുന്നളിക്കാന്‍ അനുമതി

തൃശൂരിലെ ഉത്സവങ്ങളില്‍ കൂടുതല്‍ ആനകളെ എഴുന്നളിക്കാന്‍ അനുമതി. ഉത്സവങ്ങളില്‍ പതിനൊന്ന് ആനകളെ വരെ എഴുന്നള്ളിക്കാനാണ് അനുമതി. നേരത്തെ അഞ്ച് ആനകള്‍ക്കാണ് അനുമതി നല്‍കിയിരുന്നത്. ജില്ലാ മോണിറ്ററിംഗ് കമ്മിറ്റിയുടേതാണ് തീരുമാനം. അതേസമയം ഉത്സവങ്ങള്‍ സജീവമായിട്ടും എഴുന്നള്ളിപ്പുകള്‍ക്ക് ആനയുടെ എണ്ണം വര്‍ദ്ധിപ്പിക്കാന്‍ അനുമതി നല്‍കാത്തതിനെതിരെ ആന ഉടമകള്‍ രംഗത്തെത്തിയിരുന്നു. മറ്റെല്ലാ മേഖലയിലും ഇളവുകള്‍ നല്‍കിയിട്ടും ആനകളെ എഴുന്നള്ളിക്കുന്നതില്‍ മാത്രം നിയന്ത്രണം തുടരുന്നത് അംഗീകരിക്കാനാകില്ലെന്ന് എലിഫെന്റ് ഓണേഴ്സ് ഫെഡറേഷന്‍ പറയുന്നു. ഗുരുവായൂര്‍ ആനക്കോട്ടയില്‍ അടക്കം അഞ്ഞൂറോളം നാട്ടാനകളാണുള്ളത്. ഇതില്‍ മദപ്പാട്, മറ്റ് രോഗങ്ങള്‍ എന്നിവ കാരണം 350 ഓളം ആനകളെ മാത്രമാണ് എഴുന്നള്ളിക്കാനാകുക. എന്നാല്‍ കഴിഞ്ഞ 20 മാസത്തിലേറെയായി ലക്ഷക്കണക്കിന് രൂപ നഷ്ടം സഹിച്ചാണ് ഇവര്‍ ആനകളെ പരിപാലിക്കുന്നത്.