എര്‍ദൊഗാന്റെ കൊട്ടാരത്തിന്റെ ഫോട്ടോ എടുത്തു; ചാരന്‍മാരാണെന്ന് കരുതി അറസ്റ്റില്‍; തിരിച്ചെത്തിച്ച് ഇസ്രായേല്‍

ചാരവൃത്തി ആരോപിച്ച് തുര്‍ക്കിയില്‍ തടവിലായ ഇസ്രായേലി ദമ്പതികള്‍ ജയില്‍ മോചിതരായി. സ്വകാര്യ ജെറ്റില്‍ ഇരുവരെയും ഇസ്രായേല്‍ സര്‍ക്കാര്‍ രാജ്യത്തേക്ക് തിരിച്ചെത്തിച്ചു. മോര്‍ഡി, നതാലി എന്നീ ദമ്പതികളാണ് തിരിച്ചെത്തിയത്. കഴിഞ്ഞയാഴ്ചയാണ് ഇരുവരും തുര്‍ക്കിയിലെ ഇസ്താബൂളില്‍ വെച്ച് അറസ്റ്റിലാവുന്നത്. വിനോദ യാത്രയ്‌ക്കെത്തിയ ഇവര്‍ തുര്‍ക്കി പ്രസിഡന്റ് റെജപ് തയ്യിപ് എര്‍ദൊഗാന്റെ കൊട്ടാരത്തിന്റെ ഫോട്ടോ എടുത്ത് കുടുംബാംഗങ്ങള്‍ക്ക് അയച്ചിരുന്നു. എന്നാല്‍ ഇരുവരെയും ഇസ്രായേലില്‍ നിന്നുള്ള ചാരന്‍മാരാണെന്ന് തെറ്റിദ്ധരിച്ച് തുര്‍ക്കി അധികൃതര്‍ അറസ്റ്റ് ചെയ്യുകയായിരുന്നു. എന്നാല്‍ തെറ്റിദ്ധാരണ മൂലമുണ്ടായ അറസ്റ്റാണെന്ന് ബോധ്യപ്പെടുകയും ഇസ്രായേല്‍ പ്രതിനിധികള്‍ ഇടപെട്ട് ഇരുവരെയും മോചിപ്പിക്കുകയുമായിരുന്നു. തുര്‍ക്കി സര്‍ക്കാരും ഇവരുടെ മോചനത്തിന് സഹകരിച്ചു. വ്യാഴാഴ്ച രാവിലെ ഇസ്രായേലിലെ ഗുര്യന്‍ എയര്‍ പോര്‍ട്ടിലെത്തിയ ഇരുവരും വീട്ടിലേക്ക് പോയി. ഇസ്രായേല്‍ സര്‍ക്കാരിനോട് ഇരുവരും നന്ദി പറഞ്ഞു.