കണ്ണൂര്‍ മാക്കൂട്ടം വഴി കര്‍ണാടകത്തിലേക്കുള്ള യാത്രാ നിയന്ത്രണം നവംബര്‍ 24 വരെ നീട്ടി

കണ്ണൂര്‍ മാക്കൂട്ടം വഴി കര്‍ണാടകത്തിലേക്കുള്ള യാത്രാ നിയന്ത്രണം നവംബര്‍ 24 വരെ നീട്ടി. ഇതോടെ കൊവിഡ് നിയന്ത്രണത്തില്‍ അയവുവരുമെന്ന് കരുതിയ അന്തര്‍സംസ്ഥാന യാത്രക്കാര്‍ വലഞ്ഞു. കുടക് ജില്ലാ ഭരണകൂടത്തിന്റെ നിലപാടിനെതിരെ പ്രത്യക്ഷ സമരത്തിനൊരുങ്ങുകയാണ് കുടക് നിവാസികള്‍. കൊവിഡ് പശ്ചാത്തലത്തില്‍ കര്‍ണാടകത്തിലെ കുടക് ജില്ല മാക്കൂട്ടം അതിര്‍ത്തിയില്‍ ഏര്‍പ്പെടുത്തിയ നിയന്ത്രണങ്ങള്‍ നവംബര്‍ 24 വരെ നീട്ടുകയായിരുന്നു. നവംബര്‍15 വരെ മാത്രമേ നിയന്ത്രണം ഉണ്ടാകുവെന്ന് നേരത്തെ കുടക് ജില്ലാ ഭരണകൂടം അറിയിച്ചെങ്കിലും നടപ്പായില്ല. 72 മണിക്കൂറിനുള്ളിലെടുത്ത ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റ് ഉള്ളവരെ മാത്രമാണ് കര്‍ണാടകത്തിലേക്ക് ഇതുവഴി കടത്തിവിടുന്നത്. മാക്കൂട്ടം ചുരം പാതയില്‍ കുടക് ഭരണകൂടം ഏര്‍പ്പെടുത്തിയ നിയന്ത്രണം പിന്‍വലിക്കാത്തതില്‍ കുടക് നിവാസികളും പ്രതിഷേധത്തിലാണ്. കൊവിഡ് വാക്‌സിന്‍ എടുത്തവര്‍ക്ക് ഏതു സംസ്ഥാനത്തും നിയന്ത്രണങ്ങളില്ലാതെ സഞ്ചരിക്കാമെന്നിരിക്കെയാണ് മാക്കൂട്ടം ചുരം പാത വഴിയുള്ള യാത്രയില്‍ കര്‍ണാടകം നിയന്ത്രണം കടുപ്പിച്ചിരിക്കുന്നത്. കേരളത്തില്‍ നിന്ന് വിരാജ്‌പേട്ട, മടിക്കേരി, മൈസൂര്‍, ബാംഗ്ലൂര്‍ തുടങ്ങിയ സ്ഥലങ്ങളിലേക്ക് പോകുന്ന ആയിരക്കണക്കിന് ആളുകള്‍ക്കും കര്‍ണാടകത്തിലെ വിരാജ്‌പേട്ട, മടിക്കേരി തുടങ്ങിയ സ്ഥലങ്ങളില്‍ ഉള്ള താമസക്കാര്‍ക്കും നിയന്ത്രണം ഉണ്ടാക്കുന്ന പ്രശ്‌നങ്ങള്‍ ചെറുതല്ല.