മാധ്യമ പ്രവര്‍ത്തകര്‍ക്ക് മര്‍ദനം: കോണ്‍ഗ്രസ് നേതാക്കള്‍ക്കെതിരെ നടപടിക്ക് ശുപാര്‍ശ

മാധ്യമപ്രവര്‍ത്തകരെ കോണ്‍ഗ്രസ് പ്രവര്‍ത്തകര്‍ ആക്രമിച്ചതില്‍ അന്വേഷണ റിപ്പോര്‍ട്ട് കൈമാറി. നാലു പേര്‍ക്കെതിരെ നടപടിയെടുക്കാന്‍ ശുപാര്‍ശ ചെയ്തു. ബേപ്പൂര്‍ മണ്ഡലം പ്രസിഡന്റ് രാജീവന്‍ തിരുവച്ചിറ, ചേവായൂര്‍ ബാങ്ക് പ്രസിഡന്റ് ഇ.പ്രശാന്ത് എന്നിവരെ സസ്‌പെന്‍ഡ് ചെയ്യണം. മുന്‍ ഡിസിസി പ്രസിഡന്റ് യു.രാജീവന്‍ പരസ്യമായി ഖേദം പ്രകടിപ്പിക്കണം.ഫറോക്ക് ബ്ലോക്ക് പ്രസിഡന്റ് കെ.സുരേഷിന് പരസ്യ താക്കീത് നല്‍കണമെന്നും റിപ്പോര്‍ട്ട് ആവശ്യപ്പെടുന്നു. പാര്‍ട്ടിയുടെ രണ്ടംഗ കമ്മിഷനാണ് അന്വേഷണ റിപ്പോര്‍ട്ട് ഡിസിസി പ്രസിഡന്റിന് കൈമാറിയത്. ഡിസിസി പ്രസിഡന്റ് ഈ റിപ്പോര്‍ട്ട് കെപിസിസി പ്രസിഡന്റ്‌ െക.സുധാകരന് കൈമാറിയിട്ടുണ്ട്. സുധാകരന്റെ അനുമതിയോടെ ഡിസിസി പ്രസിഡന്റ് തന്നെയാകും റിപ്പോര്‍ട്ടിന്റെ അടിസ്ഥാനത്തില്‍ നടപടി സ്വീകരിക്കുക. കോണ്‍ഗ്രസ് ഗ്രൂപ്പ് യോഗം റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകര്‍ക്കാണ് മര്‍ദനമേറ്റത്. കോണ്‍ഗ്രസ് എ ഗ്രൂപ്പിലെ ടി.സിദ്ദിഖ് അനുകൂലികള്‍ നഗരത്തിലെ സ്വകാര്യ ഹോട്ടലില്‍ യോഗം ചേരുന്നുവെന്ന് കേട്ട് എത്തിയ മാധ്യമപ്രവര്‍ത്തകരെ കോണ്‍ഗ്രസ് പ്രവര്‍ത്തകര്‍ ആക്രമിക്കുകയായിരുന്നു.