വാക്‌സീനെടുക്കാത്തവര്‍ക്ക് ലോക്ഡൗണ്‍; കടുത്ത നടപടിയുമായി ഓസ്ട്രിയ

കോവിഡ് വാക്‌സീനെടുക്കാത്തവര്‍ക്ക് ലോക്ഡൗണ്‍ ഏര്‍പ്പെടുത്തി ഓസ്ട്രിയ. 20 ലക്ഷം പേരാണ് ഓസ്ട്രിയയില്‍ ഇനി വാക്‌സീന്‍ സ്വീകരിക്കാനുള്ളത്. രോഗം വീണ്ടും അതിവേഗം പടരുന്ന സാഹചര്യത്തില്‍ ഇവര്‍ക്ക് ജോലിക്ക് പോകാനും ഭക്ഷണം വാങ്ങാനും മാത്രമാണ് പുറത്തിറങ്ങാന്‍ അനുമതി നല്‍കിയിരിക്കുന്നത്. രാജ്യത്തെ 2 മില്ല്യണ്‍ ജനങ്ങളെയാണ് ലോക്ഡൗണ്‍ ബാധിക്കുന്നതെന്നും എന്നാല്‍ 12 വയസിന് താഴെയുള്ള കുട്ടികള്‍ക്ക് ലോക്ഡൗണ്‍ ബാധകമല്ലെന്നും രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്യുന്നു. അതേസമയം, യൂറോപ്പില്‍ കോവിഡ് വ്യാപനം രൂക്ഷമായതോടെ നിരവധി രാജ്യങ്ങളാണ് വീണ്ടും നിയന്ത്രണങ്ങളിലേക്ക് കടക്കുന്നത്. ലോകത്തെ പകുതിയിലേറെ കോവിഡ് രോഗികളും യൂറോപ്പിലാണ്. കഴിഞ്ഞ ദിവസം നെതര്‍ലന്‍ഡ്‌സും ലോക്ഡൗണ്‍ പ്രഖ്യാപിച്ചിരുന്നു. രാജ്യത്തെ 82 ശതമാനം ആളുകളും വാക്‌സീന്‍ സ്വീകരിച്ചിട്ടും മൂന്നാഴ്ച്ചത്തെ ലോക്ഡൗണ്‍ ആണ് രാജ്യം പ്രഖ്യാപിച്ചിരിക്കുന്നത്.