‘സൈക്കിള്‍ പോലും ഓടിക്കാനറിയാത്ത യുവാവിനെ പൊലീസ് കാര്‍ മോഷണ കേസില്‍ കുടുക്കിയെന്ന് പരാതി

സുല്‍ത്താന്‍ ബത്തേരി: വയനാട് ഗോത്ര യുവാവിനെ കള്ളകേസില്‍ കുടുക്കിയെന്ന് പരാതി. മീനങ്ങാടി അത്തികടവ് പണിയ കോളനിയിലെ ദീപുവാണ് കാര്‍ മോഷ്ട്ടിക്കാന്‍ ശ്രമിച്ചെന്ന കുറ്റത്തിന് റിമാന്‍ഡിലായത്. സുല്‍ത്താന്‍ ബത്തേരി പൊലീസിനെതിരെ നാട്ടുകാര്‍ ജില്ലാ കലക്റ്റര്‍ക്ക് പരാതി നല്‍കി. ഈ മാസം നാലിനാണ് മീനങ്ങാടി അത്തികടവ് പണിയ കോളനിയിലെ 22 കാരന്‍ ദീപുവിനെ സുല്‍ത്താന്‍ ബത്തേരി പൊലീസ് കസ്റ്റഡിയിലെടുത്തത്. ബത്തേരി ടൗണില്‍ നിര്‍ത്തിയിട്ട കാര്‍ മോഷ്ടിച്ച് കടന്നുകളയാന്‍ ശ്രമിക്കുന്നതിനിടെയാണ് ദീപു അറസ്റ്റിലായതെന്ന് പോലീസ് പറയുന്നു. എന്നാല്‍ കൂലിവേലകള്‍ ചെയ്യുന്ന ദീപുവിന് സൈക്കിള്‍ പോലും ഓടിക്കാന്‍ അറിയില്ലെന്നും പൊലീസ് കെട്ടിച്ചമച്ച കേസാണിതെന്നുമാണ് നാട്ടുകാരുടെയും ബന്ധുക്കളുടെയും ആരോപണം. മീനങ്ങാടി പൊലീസ് സ്റ്റേഷന്‍ പരിധിയിലെ മോഷണ കേസുകളിലും ദീപുവിനെ പ്രതിയാക്കാന്‍ ശ്രമങ്ങള്‍ നടക്കുന്നതായും പരാതിയുണ്ട്. മാനന്തവാടി ജില്ല ജയിലില്‍ 14 ദിവസത്തേക്ക് റിമാന്‍ഡിലായ ദീപുവിനെ പുറത്തിറക്കണം എന്നാവശ്യപ്പെട്ട് മുഖ്യമന്ത്രിയെ സമീപിക്കാന്‍ ഒരുങ്ങുകയാണ് കുടുംബം. എന്നാല്‍ എല്ലാ തെളിവുകളോടെയുമാണ് ദീപുവിനെ അറസ്റ്റ് ചെയ്തതെന്നും കുറ്റം സമ്മതിച്ചിട്ടുണ്ടെന്നും സുല്‍ത്താന്‍ ബത്തേരി പൊലീസ് വ്യക്തമാക്കി.