വയനാട്ടില്‍ മാവോയിസ്റ്റ് നേതാക്കള്‍ റിമാന്‍ഡില്‍

വയനാട്ടില്‍ രണ്ട് മാവോയിസ്റ്റു നേതാക്കള്‍ അറസ്റ്റില്‍. ബി ജി കൃഷ്ണമൂര്‍ത്തി, സാവിത്രി എന്നിവരാണ് അറസ്റ്റിലായത്. ചൊവ്വാഴ്ച്ച രാവിലെ സുല്‍ത്താന്‍ ബത്തേരിയില്‍ വെച്ചായിരുന്നു അറസ്റ്റ്. കമ്പമല സ്വദേശിയായ ഒരാളെയും പൊലീസ് കണ്ണൂരില്‍ വച്ച് കസ്റ്റഡിയിലെടുത്തിട്ടുണ്ട്. തലശേരി കോടതിയില്‍ ഹാജരാക്കിയ ഇവരെ ഒരുമാസത്തേയ്ക്ക് റിമാന്‍ഡ് ചെയ്തു. ഉടന്‍ തന്നെ കണ്ണൂര്‍ ജില്ലാ ജയിലേയ്ക്ക് മാറ്റും. അറസ്റ്റിലായ കര്‍ണാടക സ്വദേശി ഡി ജി കൃഷ്ണമൂര്‍ത്തി പശ്ചിമഘട്ട സോണല്‍ കമ്മിറ്റിയുടെ സെക്രട്ടറിയും കേന്ദ്ര കമ്മിറ്റി അംഗവും കബനി ദളം അംഗമാണ് . കര്‍ണാടക- തമിഴ്‌നാട്- കേരള പൊലിസ് സ്റ്റേഷനുകളില്‍ നിരവധി കേസുകള്‍ ഇവരുടെ പേരില്‍ രജിസ്റ്റര്‍ ചെയ്തിട്ടുണ്ട്. കുപ്പു ദേവരാജിന്റെ മരണശേഷമാണ് ബി ജി കൃഷ്ണ മൂര്‍ത്തി പശ്ചിമഘട്ട സോണല്‍ നേതൃത്വം ഏറ്റെടുത്തത്. കമ്പമല സ്വദേശി ടാക്‌സി ഡ്രൈവറെയും പൊലീസ് കസ്റ്റഡിയിലെടുത്തിട്ടുണ്ട്. ഇയാളുടെ ഒപ്പമുണ്ടായിരുന്ന സുഹൃത്തിനെ ചോദ്യം ചെയ്തു വിട്ടയച്ചു. കമ്പമല, മക്കിമല ഭാഗങ്ങള്‍ മാവോയിസ്റ്റ് സാന്നിദ്ധ്യമുള്ള മേഖലകളാണ്. കഴിഞ്ഞ ദിവസം കബനി ദളത്തിലെ ഡെപ്യൂട്ടി കമാന്റര്‍ ആയിരുന്ന രാമു എന്ന ലിജേഷ് ജില്ലാ പൊലിസ് മേധാവിക്ക് മുമ്പില്‍ കീഴടങ്ങിയിരുന്നു. ആയുധ പരിശീലനങ്ങളടക്കം ലഭിച്ചിരുന്നുവെന്നാണ് ലിജേഷ് മൊഴി നല്‍കിയത്. കമ്പമല സ്വദേശി കസ്റ്റഡിയിലായതിലും പശ്ചിമഘട്ട സോണല്‍ സെക്രട്ടറിയായ ബി ജി കൃഷ്ണമൂര്‍ത്തിയും സാവിത്രിയും അറസ്റ്റിലായതിന് പിന്നില്‍ ലിജേഷിന്റെ വെളിപ്പെടുത്തലാണെന്നാണ് സൂചന.