വനത്തിനുള്ളില്‍ ഒരുരാത്രി തങ്ങാം, കോഴിക്കോട് നിന്നും ?ഗവിയിലേക്ക് ഉല്ലാസയാത്രാ ബസുമായി കെ.എസ്.ആര്‍.ടി.സി

വിനോദസഞ്ചാര കേന്ദ്രങ്ങളെ കോര്‍ത്തിണക്കി കൂടുതല്‍ സര്‍വീസുകള്‍ നടത്താനൊരുങ്ങി കെ.എസ്.ആര്‍.ടി.സി. കോഴിക്കോട്, കണ്ണൂര്‍ ജില്ലകളില്‍നിന്ന് ഗവി സര്‍വീസാണ് പുതിയതായി തുടങ്ങാന്‍ ലക്ഷ്യമിടുന്നത്. ഇതിനായുള്ള പ്രാഥമിക പരിശോധനകള്‍ പൂര്‍ത്തിയാക്കി. ഡിസംബര്‍ ആദ്യവാരം മുതല്‍ സര്‍വീസ് തുടങ്ങാനാണ് ലക്ഷ്യമിടുന്നത്. സഞ്ചാരികളെ പത്തനംതിട്ടയില്‍ എത്തിച്ച്, അവിടെനിന്ന് സെമി ബസില്‍ ഗവിയില്‍ കൊണ്ടുപോകും. ഇതിനായി 16 പേര്‍ക്ക് സഞ്ചരിക്കാന്‍ കഴിയുന്ന ബസാണ് ഒരുക്കുന്നത്. പത്തനംതിട്ടയില്‍ നിന്നാരംഭിക്കുന്ന സര്‍വീസ് മണിയാര്‍, മൂഴിയാര്‍, കക്കി, ആനത്തോട് വഴി ഗവിയിലെത്തും. ഒരു രാത്രി ബസില്‍ത്തന്നെ ഗവിയില്‍ താമസിക്കാനുള്ള സൗകര്യവും ഒരുക്കും. വനംവകുപ്പിന്റെ സഹകരണത്തോടെയാകും പദ്ധതി നടപ്പാക്കുന്നത്. ടിക്കറ്റേതര വരുമാനം എന്ന ലക്ഷ്യത്തിലാണ് ഇത്തരമൊരു സംരംഭത്തിന് കെ.എസ്.ആര്‍.ടി.സി. തുടക്കമിടുന്നത്. ഇതിന്റെ ഭാഗമായി കഴിഞ്ഞ ഒക്ടോബര്‍ 23-ന് ബജറ്റ് ടൂറിസം സെല്‍ എന്ന് പേരില്‍ പ്രത്യേക വിഭാഗം കെ.എസ്.ആര്‍.ടി.സി. തുടങ്ങിയിരുന്നു. ഓരോ ജില്ലയിലെയും പ്രധാന വിനോദസഞ്ചാര കേന്ദ്രങ്ങളിലേക്ക് ദിവസേന സര്‍വീസ് നടത്താനാണ് ശ്രമം. മലപ്പുറം-മൂന്നാര്‍ ടൂറിസം സര്‍വീസിന്റെ വമ്പന്‍ വിജയത്തിന് പിന്നാലെയാണ് പുതിയ സാധ്യതകള്‍ കെ.എസ്.ആര്‍.ടി.സി. തേടിയത്. കഴിഞ്ഞ ഒക്ടോബര്‍ 18-നാണ് മലപ്പുറം ഡിപ്പോയില്‍നിന്ന് മൂന്നാറിലേക്ക് വിനോദസഞ്ചാരികള്‍ക്കായുള്ള പ്രത്യേക സര്‍വീസ് ആരംഭിച്ചത്. ഒരു ലോ ഫ്‌ളോര്‍ എ.സി. ബസടക്കം മൂന്ന് വണ്ടികളാണ് സര്‍വീസ് നടത്തിയിരുന്നത്. സര്‍വീസ് തുടങ്ങി രണ്ടാഴ്ചകൊണ്ട് 635-പേരാണ് ഈ ബസുകളിലെത്തി മൂന്നാര്‍ സന്ദര്‍ശിച്ചത്. ഇതിന് തൊട്ടുപിന്നാലെ തിരുവനന്തപുരം, അടൂര്‍, പാലാ ഡിപ്പോകളില്‍നിന്നും മൂന്നാറിലേക്ക് ടൂറിസം ട്രിപ്പുകള്‍ തുടങ്ങി. കൂടാതെ തിരുവല്ല, പാലാ ഡിപ്പോകളില്‍നിന്ന് ചാലക്കുടി മലക്കപ്പാറയ്ക്കും സര്‍വീസ് തുടങ്ങി. തുടക്കത്തില്‍ ഒറ്റസര്‍വീസുകളാണ് ഡിപ്പോകളില്‍ നിന്ന് ഇതിനായി വിനിയോഗിച്ചതെങ്കിലും പിന്നീട് യാത്രക്കാരുടെ എണ്ണം കൂടിയതോടെ സര്‍വീസുകളും ഇരട്ടിയാക്കി.