ചാനല്‍ ചര്‍ച്ചയ്ക്ക് ബിജെപിക്ക് 22 പേരുടെ പട്ടിക; പ്രോട്ടോക്കോള്‍ ഓഫിസര്‍മാര്‍ മാറും

ഇനി മുതല്‍ ചാനല്‍ ചര്‍ച്ചയ്ക്ക് ബിജെപി പ്രതിനിധിയെ കിട്ടാന്‍ പാര്‍ട്ടി സംസ്ഥാന ഓഫിസില്‍ വിളിക്കണം. ഇഷ്ടപ്പെട്ട വക്താക്കളെ നേരിട്ടു വിളിച്ചാല്‍ ചാനലുകള്‍ക്കു കിട്ടില്ലെന്നു ചുരുക്കം. ഇങ്ങനെ വിളിക്കുന്ന ചാനലുകള്‍ക്കു നല്‍കാന്‍ 22 പേരുടെ പട്ടികയും ബിജെപി തയാറാക്കി. ചാനലുകളില്‍ വന്നിരുന്ന് ഇവരാകും ഇനി പാര്‍ട്ടി നിലപാടുകള്‍ പറയുക. പലരും പലതും ചാനലിലിരുന്നു പറയുന്നത് പാര്‍ട്ടിക്ക് അവമതിപ്പുണ്ടാക്കുന്നുവെന്നു തിരിച്ചറിഞ്ഞാണു പുതിയ നീക്കം. സംസ്ഥാന കമ്മിറ്റി യോഗം ചര്‍ച്ച ചെയ്‌തെടുത്ത തീരുമാനം ഉടന്‍ നടപ്പാക്കും.പാര്‍ട്ടിയുടെ കേന്ദ്രനേതാക്കളും മന്ത്രിമാരും കേരളത്തിലെത്തിയാല്‍ വിമാനത്താവളങ്ങളില്‍ സ്വീകരിക്കുന്ന പ്രോട്ടോക്കോള്‍ ഓഫിസര്‍മാരിലും മാറ്റമുണ്ടായിട്ടുണ്ട്. അല്‍പനാള്‍ മുന്‍പ് കൊച്ചിയിലിറങ്ങിയ ഒരു കേന്ദ്രമന്ത്രിക്കു പാര്‍ട്ടി ജില്ലാ കമ്മിറ്റിയൊരുക്കിയ വാഹനവും താമസവും സ്വീകരിക്കാതെ നേതാക്കളിലൊരാള്‍ സ്വന്തമായി ഒരുക്കിയ വാഹനത്തില്‍ സ്വകാര്യഹോട്ടലില്‍ തങ്ങിയതു വിവാദമായിരുന്നു. പിന്നീട് ഈ മന്ത്രിക്കു സ്ഥാനവും തെറിച്ചു.