ദുരന്തമുഖത്ത് നീണ്ട ആ കൈകള്‍: ടിഎന്‍ജി പുരസ്‌കാരം കരിപ്പൂരിലെ രക്ഷാ പ്രവര്‍ത്തകര്‍ക്ക്

പ്രശസ്ത മാധ്യമപ്രവര്‍ത്തകന്‍ ടി എന്‍ ഗോപകുമാറിന്റെ പേരിലുള്ള 2020-ലെ ടിഎന്‍ജി പുരസ്‌കാരം കരിപ്പൂര്‍ വിമാനദുരന്തത്തില്‍ മനുഷ്യത്വത്തിന്റെ കൈകള്‍ നീട്ടിയ പ്രദേശവാസികള്‍ക്ക്. കഴിഞ്ഞ ആഗസ്റ്റില്‍ കേരളം കണ്ട വലിയ ദുരന്തമായിരുന്നു കരിപ്പൂരിലെ വിമാന അപകടം. ആ ദുരന്തത്തില്‍ പെട്ട ഭൂരിഭാഗം യാത്രക്കാര്‍ക്കും ആയുസ്സ് നീട്ടിക്കിട്ടിയത് പ്രദേശവാസികളുടെ തിടുക്കത്തിലുള്ള രക്ഷാപ്രവര്‍ത്തനം കാരണമാണ്. കേരളം കണ്ട ഏറ്റവും മനുഷ്യത്വമുള്ള രക്ഷാപ്രവര്‍ത്തകരായിരുന്നു കരിപ്പൂരിലേത്.
മുന്‍ ചീഫ് സെക്രട്ടറി നളിനി നെറ്റോ ഐഎഎസ്, മുന്‍ ഡിജിപി ഹേമചന്ദ്രന്‍ ഐപിഎസ്, ദില്ലി സെന്റ് സ്റ്റീഫന്‍ കോളേജ് പ്രിന്‍സിപ്പലായിരുന്ന റവറന്റ് ഫാദര്‍ വത്സന്‍ തമ്പു എന്നിവര്‍ അംഗങ്ങളായ ജൂറിയാണ് ജേതാക്കളെ തെരഞ്ഞെടുത്തത്. രണ്ട് ലക്ഷം രൂപയും കാനായി കുഞ്ഞിരാമന്‍ രൂപകല്‍പ്പന ചെയ്ത ശില്‍പ്പവുമാണ് പുരസ്‌കാരം. ടിഎന്‍ജിയുടെ ഓര്‍മദിനമായ നാളെ വൈകീട്ട് 5 മണിക്ക് തിരുവനന്തപുരം മാസ്‌കറ്റ് ഹോട്ടലില്‍ നടക്കുന്ന ചടങ്ങില്‍ മിസോറം ഗവര്‍ണര്‍ പി എസ് ശ്രീധരന്‍ പിളള പുരസ്‌കാരം സമ്മാനിക്കും. ചടങ്ങില്‍ മന്ത്രി കടകംപളളി സുരേന്ദ്രന്‍, മുന്‍ മന്ത്രി വിഎം സുധീരന്‍ എന്നിവര്‍ പങ്കെടുക്കും. ടെലിഗ്രാഫ് എഡിറ്റര്‍ ആര്‍ രാജഗോപാല്‍ ടിഎന്‍ജി അനുസ്മരണപ്രഭാഷണം നടത്തും.
പരിചിതര്‍ പോലും അകന്നിരുന്ന കൊവിഡ് കാലത്ത് അസാധാരണ തീരുമാനത്തിലൂടെ ഒരു കുടുംബത്തെ, അവരുടെ കുഞ്ഞുങ്ങളെ ചേര്‍ത്ത് നിര്‍ത്തിയ ഡോ.മേരി അനിത, പത്തനംതിട്ട ജില്ലയെ പ്രതിസന്ധികാലത്ത് മികവോടെ നയിച്ച പി ബി നൂഹ് ഐഎഎസ്, കരിപ്പൂരില്‍ വിമാനദുരന്തത്തില്‍ പെട്ടവരെ രക്ഷിക്കാന്‍ തടസ്സങ്ങള്‍ വകവെക്കാതെ മുന്നിട്ടിറങ്ങിയ മനുഷ്യത്വമുളള മുഖങ്ങള്‍, കാസര്‍കോടിന് തുണയായി കൊവിഡ് ചികിത്സയ്ക്ക് ആശുപത്രിയൊരുക്കിയ ടാറ്റാ ഗ്രൂപ്പ് എന്നിവരാണ് അവസാന റൗണ്ടിലെത്തിയ നാല് എന്‍ട്രികള്‍.