‘പുഷ്പ ‘യുമായി അല്ലു അര്‍ജ്ജുന്‍ ഓഗസ്റ്റ് 13ന് തിയറ്ററുകളില്‍

അല്ലു അര്‍ജുന്റെ പുതിയ ചിത്രം പുഷ്പ ഓഗസ്റ്റ് 13ന് തിയറ്ററുകളില്‍ എത്തും. ആര്യ, ആര്യ 2 എന്നീ സൂപ്പര്‍ഹിറ്റ് ചിത്രങ്ങള്‍ക്ക് ശേഷം സുകുമാര്‍ – അല്ലു അര്‍ജുന്‍ കൂട്ടുകെട്ട് വീണ്ടുമൊന്നിക്കുന്ന ചിത്രം ആക്‌ഷന്‍ ത്രില്ലറാണ്.

രശ്മിക മന്ദനയാണ് നായിക. പ്രകാശ് രാജ്, സുനില്‍, ഹരീഷ് ഉത്തമന്‍ എന്നിവരാണ് മറ്റ് പ്രധാനതാരങ്ങള്‍. ചിത്രത്തിന്റെ നിര്‍മാണം മൈത്രി മൂവി മേക്കേഴ്‌സാണ്. രംഗസ്ഥലത്തിന് ശേഷം സുകുമാര്‍ – മൈത്രി മൂവി മേക്കേഴ്‌സ് കൂട്ടുകെട്ടില്‍ ഒരുങ്ങുന്ന രണ്ടാമത്തെ ചിത്രമാണ് പുഷ്പ.

തെലുങ്ക്, തമിഴ്, കന്നഡ, മലയാളം, ഹിന്ദി എന്നിങ്ങനെ അഞ്ച് ഭാഷകളില്‍ ചിത്രം റിലീസിനെത്തും. ദേവി ശ്രീ പ്രസാദ് ആണ് സംഗീതം കൈകാര്യം ചെയ്യുന്നത്. തെലുങ്ക് റിലീസിന്റെ അന്ന് തന്നെ കന്നഡ ഭാഷയിലും റിലീസ് ചെയ്യപ്പെടുന്ന ആദ്യ അല്ലു അര്‍ജുന്‍ ചിത്രം കൂടിയാകും പുഷ്പ.