‘മലയാളി എന്ന നിലയില്‍ അഭിമാനം’; ഷൈലജ ടീച്ചര്‍ റോള്‍ മോഡലെന്ന് മഞ്ജു വാര്യര്‍

കെ കെ ഷൈലജ ടീച്ചര്‍ക്ക് ആരോഗ്യ മേഖലയിലെ പ്രവര്‍ത്തനങ്ങള്‍ക്ക് ലഭിച്ച അംഗീകാരങ്ങള്‍ ഒരു മലയാളി എന്ന നിലയില്‍ അഭിമാനമുണ്ടാക്കുന്നതാണെന്ന് നടി മഞ്ജു വാര്യര്‍. ടീച്ചര്‍ ജീവിതത്തില്‍ തന്റെ റോള്‍ മോഡലാണെന്നും മഞ്ജു പറഞ്ഞു. മനോരമ ന്യൂസിന്റെ ന്യൂസ് മെയ്ക്കര്‍ എന്ന പരിപാടിയില്‍ പങ്കെടുത്ത് സംസാരിക്കുകയായിരുന്നു മഞ്ജു. നിപ്പ മുതല്‍ കൊവിഡ് വരെയുള്ള ആരോഗ്യ മേഖലയിലെ പ്രവര്‍ത്തനങ്ങള്‍ക്ക് ഷൈല ടീച്ചര്‍ക്ക് ലഭിച്ച അംഗീകാരങ്ങളെ എങ്ങിനെ കാണുന്ന എന്ന ചോദ്യത്തിനാണ് മഞ്ജു മറുപടി പറഞ്ഞത്.
മലയാളി എന്ന നിലയില്‍ എനിക്ക് വളരെ അഭിമനാമുണ്ട്. അംഗീകാരങ്ങളെല്ലാം വളരെ അര്‍ഹതപ്പെട്ടത് തന്നെയാണെന്നാണ് എനിക്ക് പറയാനുള്ളത്. ഇനിയും ഒരുപാട് നേട്ടങ്ങള്‍ ടീച്ചര്‍ക്ക് ഉണ്ടാവട്ടെയെന്നും ആയുരാരോഗ്യ സൗഖ്യങ്ങള്‍ ഉണ്ടാകട്ടെയെന്നും, ഞങ്ങളെ എല്ലാം നോക്കുന്നതിനിടയില്‍ ടീച്ചര്‍ സ്വന്തം ആരോഗ്യം കൂടെ നോക്കണമെന്നും ഞാന്‍ പറയാന്‍ ആഗ്രഹിക്കുകയാണ്.ഷൈലജ ടീച്ചറെ വിളിച്ച് ആരോഗ്യത്തെ കുറിച്ചെല്ലാം അന്വേഷിക്കാറുണ്ട്. ടീച്ചറും തിരിച്ച് മഞ്ജുവിനെ വിളിക്കാറുണ്ട്. പുസ്തകങ്ങള്‍ വായിക്കണമെന്ന് എന്നെ ഉപദേശിക്കാറുണ്ട്. ഇത്തരത്തില്‍ ഇരുവരും തമ്മിലുള്ള വ്യക്തിപരമായ സംഭാഷണങ്ങളില്‍ ഇതെല്ലാം അന്വേഷിക്കാറുണ്ട്. ഷൈലജ ടീച്ചര്‍ തന്റെ ജീവിതത്തിലെ റോള്‍ മോഡലാണെന്നും മഞ്ജു പറഞ്ഞു.
ഒരു കലാകാരി എന്ന നിലയില്‍ സ്നേഹിക്കുകയും ബഹുമാനിക്കുകയും ചെയ്യുന്ന വ്യക്തിയാണ് മഞ്ജു എന്ന് ഷൈലജ ടീച്ചര്‍ പരിപാടിയില്‍ പറഞ്ഞു. കേരളത്തിലെ സ്ത്രീകള്‍ക്ക് ജീവിതത്തിലെ പ്രതിസന്ധികളെ തരണം ചെയ്ത് മുന്നോട്ട് പോകാന്‍ സാധിക്കുന്ന മികച്ച മാതൃകയാണ് മഞ്ജു വാര്യരെന്നും ടീച്ചര്‍ വ്യക്തമാക്കി.
ഞാന്‍ വളരെയധികം സ്നേഹിക്കുകയും ബഹുമാനിക്കുകയും ചെയ്യുന്ന ഒരു കലാകാരിയാണ് മഞ്ജു. ഞാന്‍ കേരളത്തിലെ സ്ത്രീകളുടെയും കുട്ടികളുടെയും വകുപ്പ് കൂടി കൈകാര്യം ചെയ്യുന്നുണ്ട്. ഞങ്ങള്‍ കേരളത്തിലെ സ്ത്രീകളോട് പറയുന്ന കാര്യങ്ങള്‍ സധൈര്യം മുന്നോട്ട്, വീഴ്ച്ചകളില്‍ പദറി പോകാതെ പിടിച്ച് നില്‍ക്കുക, അവരുടെതായ വ്യക്തിത്വത്തെ പ്രകാശിപ്പിച്ച് മുന്നോട്ട് പോവുക എന്നൊക്കെയാണ്. അപ്പോള്‍ ഇതിന്റെയെല്ലാം പ്രധാനപ്പെട്ട ഒരു ഐക്കണായി മഞ്ജു മുന്നില്‍ നില്‍ക്കുകയാണ്.കെകെ ഷൈലജ പറഞ്ഞു.
മഞ്ജു വാര്യര്‍ പ്രൊഡക്ഷന്‍സിന്റെ ബാനറില്‍ മധു വാര്യര്‍ സംവിധാനം ചെയ്ത 'ലളിതം സുന്ദരത്തിലാണ്' മഞ്ജു അവസാനമായി അഭിനയിച്ചത്. മഞ്ജു, ബിജു മേനോന്‍ എന്നിവര്‍ വര്‍ഷങ്ങള്‍ക്ക് ശേഷം ഒന്നിക്കുന്ന ചിത്രം കൂടിയാണിത്. ഓരായിരം കിനാക്കള്‍ എന്ന ചിത്രത്തിന്റെ സംവിധായകനായ പ്രമോദ് മോഹനാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. പി സുകുമാരനാണ് ഛായാഗ്രാഹകന്‍. ബിജിപാല്‍ സംഗീത സംവിധാനം നിര്‍വ്വഹിക്കുന്ന ചിത്രത്തിന്റെ എഡിറ്റര്‍ ലിജോ പോളാണ്. സൈജു കുറിപ്പ്, രഖുനാഥ് പലേരി, സറീനാ വഹാബ് എന്നിവരും ചിത്രത്തില്‍ പ്രധാന വേഷം ചെയ്യുന്നുണ്ട്.