റഹ്മാന്‍ വീണ്ടും നായകനാകുന്നു; കശ്മീരില്‍ ചിത്രീകരണം തുടങ്ങി

ഒരിടവേളയ്ക്ക് ശേഷം റഹ്മാന്‍ വീണ്ടും നായകനാകുന്നു. ഫോറന്‍സിക് ആധാരമായുള്ള ഒരു ഇന്‍വെസ്റ്റ്‌റിഗേഷന്‍ ത്രില്ലറായ പ്രമേയം അവതരിപ്പിച്ചുകൊണ്ട്‌ 'സമാറ' എന്നു പേരിട്ടിരിക്കുന്ന സിനിമയുടെ പോസ്റ്റര്‍ ടൊവിനോ തോമസും സണ്ണി വെയിനുമാണ് സോഷ്യല്‍ മീഡിയയിലൂടെ പ്രഖ്യാപിച്ചത്. പുതുമുഖ യുവ സംവിധായകന്‍ ചാള്‍സ് ജോസഫാണ് സമാറയെ അണിയിച്ചൊരുക്കുന്നത്.

ബഹുഭാഷാ ചിത്രമെന്ന പ്രത്യേകതയും ചിത്രത്തിനുണ്ട്. നിവിന്‍ പോളിയുടെ 'മൂത്തോനി'ലൂടെ ശ്രദ്ധേയയായ സഞ്ജന ദീപു , രാഹുല്‍ മാധവ്, ബിനോജ് വില്ല്യ, വീര്‍ ആര്യന്‍, ശബരീഷ് വര്‍മ്മ, ബില്ലി, വിവിയ, നീത് ചൗധരി എന്നിവര്‍ മറ്റു പ്രധാന കഥാപാത്രങ്ങളെ അവതരിപ്പിക്കുന്നു. പീക്കോക് ആര്‍ട്ട് ഹൗസിന്റെ ബാനറില്‍എം. കെ സുഭാകരന്‍, അനുജ് വര്‍ഗീസ് വില്ല്യാടത്ത് എന്നിവര്‍ ചേര്‍ന്നു നിമ്മിക്കുന്ന പ്രഥമ ചിത്രമായ 'സമാറ' യുടെ ചിത്രീകരണം കശ്മീരില്‍ തുടങ്ങി.