ഇന്ത്യയില്‍ അനുമതി നല്‍കിയ രണ്ട് വാക്സിനുകളും സുരക്ഷിതമെന്ന് ആവര്‍ത്തിച്ച് കേന്ദ്രസര്‍ക്കാര്‍

ഇന്ത്യയില്‍ ഉപയോഗിക്കാന്‍ അനുമതി നല്‍കിയ രണ്ട് വാക്സിനുകളും സുരക്ഷിതമെന്ന് ആവര്‍ത്തിച്ച് കേന്ദ്രസര്‍ക്കാര്‍. പാര്‍ശ്വഫലങ്ങളും, ഗുരുതര പ്രശ്നങ്ങളും സംബന്ധിച്ച ആശങ്കകള്‍ക്ക് ഇപ്പോള്‍ പ്രസക്തിയില്ല. ചികിത്സയില്‍ ഉള്ളവരുടെ എണ്ണം 5000ല്‍ അലധികമുള്ളത് കേരളത്തിലും മഹാരാഷ്ട്രയിലും മാത്രമാണെന്ന് ആരോഗ്യ മന്ത്രാലയം വ്യക്തമാക്കി. ജനിതക മാറ്റം വന്ന യുകെ വൈറസ് ഇതുവരെ 118 പേരില്‍ കണ്ടെത്തിയെന്നും കേന്ദ്ര സര്‍ക്കാര്‍ അറിയിച്ചു.
വാക്സിനേഷന്‍ സംബന്ധിച്ച വാര്‍ത്താസമ്മേളനത്തിലാണ് ആരോഗ്യമന്ത്രാലയം കണക്കുകള്‍ പുറത്തുവിട്ടത്. രാജ്യത്ത് 454,049 പേര്‍ക്ക് ഇതുവരെ വാക്സിന്‍ നല്‍കി. പാര്‍ശ്വഫലങ്ങള്‍ അടക്കം പ്രതികൂല സംഭവങ്ങള്‍ 0.18 ശതമാനം മാത്രമാണ്. 0.002 ശതമാനം പേര്‍ മാത്രമാണ് ആശുപത്രിയില്‍ ചികിത്സ തേടിയത്. മൂക്കില്‍ ഒഴിക്കുന്ന വാക്സിന്‍ വികസിപ്പിക്കാനും ശ്രമം തുടങ്ങി. അത് വിജയിച്ചാല്‍ വഴിത്തിരിവാകുമെന്ന് നീതി ആയോഗ് അംഗം ഡോ. വി.കെ. പോള്‍ പറഞ്ഞു. ചികിത്സയിലുള്ള കൊവിഡ് രോഗികളില്‍ 72 ശതമാനവും കേരളം, മഹാരാഷ്ട്ര, ഉത്തര്‍പ്രദേശ്, കര്‍ണാടക, പശ്ചിമ ബംഗാള്‍ സംസ്ഥാനങ്ങളിലാണ്. തമിഴ്നാടും പുതുച്ചേരിയും പഞ്ചാബും വാക്സിനേഷന്‍ പ്രക്രിയ ഊര്‍ജിതപ്പെടുത്തണമെന്നും ആരോഗ്യ മന്ത്രാലയം ആവശ്യപ്പെട്ടു.