സിംഗിള്‍ ഡോസ് വാക്സിനുമായി ജോണ്‍സന്‍ ആന്‍ഡ് ജോണ്‍സന്‍

ലോകത്തെ കൊവിഡ് പ്രതിരോധ വാക്‌സിന്‍ പരീക്ഷണങ്ങളില്‍ ഒരു ചുവടു കൂടി മുന്നേറി ഔഷധ മേഖലയിലെ ബഹുരാഷ്ട്ര കുത്തകകളായ അമെരിക്കന്‍ കമ്പനി ജോണ്‍സന്‍ & ജോണ്‍സന്‍. ഇവരുടെ പുതിയ കൊവിഡ് വാക്‌സിന്‍ ഏറെ വൈകാതെ ഇറങ്ങുമെന്നാണു സൂചന. ഇതുവരെയുള്ള എല്ലാ കൊവിഡ് വാക്‌സിനുകള്‍ക്കും രണ്ടു ഡോസ് എടുക്കണമെങ്കില്‍ ജോണ്‍സന്റേതിന് ഒരൊറ്റ ഡോസ് മതി. ഓക്‌സ്ഫഡ്- ആസ്ട്രസെനക വാക്‌സിന്റെയും റഷ്യയുടെ സ്ഫുട്‌നിക് വി വാക്‌സിന്റെയും അതേ വൈറല്‍-വെക്റ്റര്‍ സാങ്കേതിക വിദ്യയാണ് ജോണ്‍സന്റെ വാക്‌സിനും. ഇതു ഫലപ്രദമാണെന്നാണ് ആദ്യ റിപ്പോര്‍ട്ടുകള്‍ കാണിക്കുന്നത്. ഏതാനും ആഴ്ചകള്‍ക്കകം ജോണ്‍സന്റെ വാക്‌സിന് അമെരിക്ക അടിയന്തര ഉപയോഗ അനുമതി നല്‍കിയേക്കുമെന്നാണു സൂചന. ഫൈസറിന്റെയും മോഡേണയുടെയും വാക്‌സിനുകള്‍ രണ്ട് ഡോസ് എടുത്താലുള്ള ഫലശേഷി ജോണ്‍സന്റെ ഒരൊറ്റ ഡോസിനു കിട്ടുന്നുണ്ടെന്നാണ് പ്രാഥമിക പരീക്ഷണങ്ങളില്‍ തെളിഞ്ഞിട്ടുള്ളതത്രേ. മൂന്നാം ഘട്ടം പരീക്ഷണത്തിന്റെ കൃത്യമായ ഫലം വന്നിട്ടില്ലെങ്കിലും ആശാവഹമായ റിപ്പോര്‍ട്ടാണ് ആദ്യഘട്ടത്തിലേത്. രോഗബാധയുണ്ടായാലും അത് ഗുരുതരമാവാതിരിക്കാനുള്ള മാര്‍ഗങ്ങളും ജോണ്‍സന്‍ പരീക്ഷിക്കുന്നുണ്ടെന്നും ഇത് കൂടുതല്‍ ആശാവഹമെന്നും വാക്‌സിന്‍ മേഖല നിരീക്ഷിക്കുന്നവര്‍ ചൂണ്ടിക്കാണിക്കുന്നു.