കേരളത്തില്‍ ആദ്യഘട്ട കോവിഡ് പ്രതിരോധമരുന്ന് ബുധനാഴ്ച എത്തും

തിരുവനന്തപുരം: കേരളത്തില്‍ ആദ്യഘട്ട കോവിഡ് പ്രതിരോധമരുന്ന് ബുധനാഴ്ച എത്തും. ആരോഗ്യപ്രവര്‍ത്തകര്‍ക്ക് നല്‍കാനുള്ള പ്രതിരോധമരുന്നാണ് നിലവില്‍ എത്തുന്നത്. 4,35,500 ഡോസ് മരുന്നാണ് ഇതിനായി അനുവദിച്ചിട്ടുള്ളത്. അതില്‍ 1100 ഡോസ് മാഹിയില്‍ വിതരണം ചെയ്യാനുള്ളതാണ്.ജനുവരി 16 നാണ് മുന്‍കൂട്ടി രജിസ്റ്റര്‍ ചെയ്തിട്ടുള്ള ആരോഗ്യപ്രവര്‍ത്തകര്‍ക്ക് പ്രതിരോധമരുന്ന് നല്‍കുക.
മൂന്നുലക്ഷം ഡോസ് മരുന്നാണ് ബുധനാഴ്ച ഉച്ചയ്ക്കുശേഷം ആദ്യബാച്ചായി പുണെ സിറം ഇന്‍സ്റ്റിറ്റ്യൂട്ടില്‍നിന്ന് നെടുമ്പാശേരി വിമാനത്താവളത്തിലെത്തിക്കുക. ശീതീകരണസംവിധാനമുള്ള പ്രത്യേക വാഹനത്തിലാണ് ഇത് കൊച്ചി റീജണല്‍ സ്റ്റോറിലെത്തിച്ച് സൂക്ഷിക്കുക. മലബാര്‍ മേഖലയിലേക്കടക്കം വിതരണം ചെയ്യാനായി ആണിത്.

തിരുവനന്തപുരത്ത് 1,34,000 ഡോസും എറണാകുളത്ത് 1,80,000 ഡോസും കോഴിക്കോട്ട് 1,19,500 ഡോസും വാക്‌സിനുകളാണ് എത്തിക്കുക.വൈകീട്ട് ആറോടെ രണ്ടാമത്തെ ബാച്ചായി ബാക്കി മരുന്ന് തിരുവനന്തപുരത്ത് എത്തിക്കും. തിരുവനന്തപുരത്തെ റീജണല്‍സ്റ്റോറിലേക്ക് മാറ്റുന്ന ഇത് 14-ന് കൊല്ലം, പത്തനംതിട്ട, ആലപ്പുഴ ജില്ലകളിലേക്കും നല്‍കും. തിരുവനന്തപുരം ജില്ലയ്ക്കാവശ്യമായവ 15-ന് വിതരണകേന്ദ്രങ്ങളിലെത്തിക്കാനാണ് തീരുമാനിച്ചിട്ടുള്ളത്.സംസ്ഥാനമാകെ 113 കേന്ദ്രങ്ങളിലായിയാണ് പ്രതിരോധമരുന്ന് നല്‍കുന്നത്. ഇതില്‍ 3,59,549 ആരോഗ്യപ്രവര്‍ത്തകരാണ് രജിസ്റ്റര്‍ ചെയ്തിട്ടുള്ളത്. സര്‍ക്കാര്‍ മേഖലയിലെ 1,70,259 പേരും സ്വകാര്യ മേഖലയിലെ 1,92,611 പേരുമാണ് രജിസ്റ്റര്‍ ചെയ്തിട്ടുണ്ട്..