കടുവ വീണ്ടും ആടിനെ കൊന്നു; നാട്ടുകാര്‍ ഭീതിയില്‍

സുല്‍ത്താന്‍ ബത്തേരി: കടുവ വീണ്ടും ആടിനെ കൊന്നു. വനയോര മേഖലയായ വടക്കനാട് വീണ്ടും കടുവയുടെ സാന്നിധ്യം കണ്ടിരിക്കുന്നു. ചൊവ്വാഴ്ച പുലര്‍ച്ച പണയമ്പത്തെ ചടച്ചിപ്പുര കുഞ്ഞുലക്ഷ്മിയുടെ ആട്ടിന്‍കൂട്ടില്‍ കെട്ടിയ ആടുകളിലൊന്നിനെ കടുവ കൊന്നു.ആടിന്റെ കരച്ചില്‍ കേട്ട് പുറത്തിറങ്ങിയ കുഞ്ഞുലക്ഷ്മി കടുവയെ കണ്ടതായി പറയുന്നു. ചൊവ്വാഴ്ച പകല്‍ പ്രദേശത്ത് വനംവകുപ്പ് തിരച്ചില്‍ നടത്തിയെങ്കിലും ഒന്നും കണ്ടെത്താനായില്ല.

രണ്ടുമാസത്തെ ഇടവേളക്കുശേഷമാണ് വടക്കനാട് കടുവ എത്തുന്നത്. സാധാരണ ഇവിടെ കടുവസാന്നിധ്യമുണ്ടായാല്‍ മിക്ക ദിവസങ്ങളിലും വളര്‍ത്തുമൃഗങ്ങള്‍ കൊല്ലപ്പെടാറുണ്ട്. കൂട് സ്ഥാപിക്കലും നിരീക്ഷണവും മുറക്ക് നടക്കും. ഇപ്പോഴും അതേ സാഹചര്യമാണ് ഉണ്ടായിട്ടുള്ളത്.

വടക്കനാട്, പണയമ്പം ഭാഗങ്ങള്‍ ചെതലയം കാടിനോടു ചേര്‍ന്നാണ്. ബന്ദിപ്പൂര്‍, മുതുമല കടുവാസങ്കേതങ്ങളുമായി ബന്ധപ്പെട്ടുകിടക്കുന്ന മുത്തങ്ങ വനത്തില്‍നിന്നു മൃഗങ്ങള്‍ക്ക് വടക്കനാട് എത്താന്‍ എളുപ്പമാണ്. ഇടക്കിടെ കടുവ എത്താന്‍ ഈ സാഹചര്യം കാരണമാകുന്നുണ്ട്.

രണ്ടു മാസം മുമ്പ് കാടുകയറിപ്പോയ കടുവയായിരിക്കും ഇപ്പോള്‍ തിരിച്ചെത്തിയതെന്ന നിഗമനത്തിലാണ് നാട്ടുകാര്‍. ഒരു വര്‍ഷം മുമ്പാണ് വടക്കനാട് കാട്ടില്‍ വിറക് ശേഖരിക്കാന്‍ പോയ ജഡയന്‍ എന്ന ആദിവാസിയെ കടുവ കൊന്ന് ഭക്ഷിച്ചത്.