പണമടച്ചിട്ടും പിന്‍മാറുന്നില്ലെന്ന് പരാതി;ഫെഡറല്‍ ബാങ്കിന് മുന്‍പില്‍ വീട്ടുടമസ്ഥന്റെ പ്രതിഷേധം

വീട് ജപ്തിയെ തുടര്‍ന്ന് കോടതിയുത്തരവു പ്രകാരം ഭാഗികമായി പണമടച്ചിട്ടും പരിഗണിക്കുന്നില്ലെന്ന പരാതിയുമായി ഫെഡറല്‍ ബാങ്കിനു മുന്നില്‍ വീട്ടുടമകളുടെ ധര്‍ണ. കോഴിക്കോട് അത്തോളി, കൊടശ്ശേരി അബുവിന്റെ പേരിലുളള വീടാണ് ബാധ്യതയെ തുടര്‍ന്ന് ജപ്തി ചെയ്തത്. 20 ലക്ഷം രൂപയാണ് ലോണ്‍. നിലവില്‍ 26 ലക്ഷം രൂപ അടയ്ക്കണമെന്നാണ് ബാങ്ക് അറിയിച്ചതെന്ന് അബുവിന്റെ മകന്‍ ഷൗക്കത്ത് പറഞ്ഞു. മൂത്ത മകന്‍ മുഹമ്മദലിയുടെ പേരിലാണ് ലോണ്‍. അതേസമയം പലിശയിനത്തില്‍ ലക്ഷങ്ങള്‍ ബാങ്കില്‍ അടച്ചു കഴിഞ്ഞിട്ടുണ്ട്. അബുവിന്റെ രണ്ടു മക്കള്‍ ചേര്‍ന്നു ഫെഡറല്‍ ബാങ്കില്‍ നിന്നും ലോണെടുത്ത് ഫ്‌ളെക്‌സ് പ്രിന്റിംഗ് മേഖലയില്‍ മുതല്‍ മുടക്കുകയായിരുന്നു. അബുവിന്റെ തന്നെ ഉള്ള്യേരി കൂനഞ്ചേരി ഭാഗത്തുള്ള 58 സെന്റ് സ്ഥലത്തിന് 21 ലക്ഷം രൂപയും ലോണുണ്ട്. ഫ്‌ളക്‌സ് നിരോധനത്തോടെ ഇവരുടെ വരുമാനം കുറഞ്ഞു. കൊറോണകൂടി എത്തിയതോടെ ബിസിനസ് പാടെ നിലക്കുകയും ചെയ്തു. രണ്ടു ലോണുകള്‍ക്കുമായി ഇതുവരെ 25 ലക്ഷത്തോളം രൂപ അടച്ചു. പുറമേ കോടതി ഉത്തരവിനെ തുടര്‍ന്ന് 8 ലക്ഷം രൂപ അക്കൗണ്ടിലും രണ്ടു ലക്ഷം രൂപ ഡി.ഡി ആയും അടച്ചുതായി ഇവര്‍ പറയുന്നു. എന്നാല്‍ ഇതു ബാങ്ക് വകവെക്കുന്നില്ലെന്നാണ് ഉടമകളുടെ പരാതി. അടച്ച തുകയും ഇളവുകളും കഴിച്ചു ബാക്കിയുള്ള സംഖ്യ അടയ്ക്കാന്‍ തയ്യാറാണ്. എന്നാല്‍ 26 ലക്ഷം രൂപ അടച്ചാല്‍ മാത്രമേ നടപടികള്‍ അവസാനിപ്പിക്കാന്‍ കഴിയൂ എന്ന് ബാങ്ക് അധികൃതര്‍ വ്യക്തമാക്കിയതായി ഉടമകള്‍ ആരോപിക്കുന്നുകുട്ടികള്‍ അടക്കം പത്തോളം പേരുള്ള കുടുംബം ഇപ്പോള്‍ വാടക വീട്ടിലാണ് താമസം. കൊറോണ കാലമായതോടെ വാടക നല്‍കാന്‍ പോലും പ്രയാസപ്പെടുകയാണ് കുടുംബം.