ഒമാനില്‍ ദിവസങ്ങളായുളള കൊടുംതണുപ്പ് ഇന്ന് അവസാനിക്കും

മസ്‌കത്ത്: കഴിഞ്ഞ ഏതാനും ദിവസങ്ങളായി ഒമാനില്‍ അനുഭവപ്പെടുന്ന കൊടുംതണുപ്പിന് മോചനം ലഭിക്കുകയാണ്. ഇന്ന് ഈ അതിശൈത്യത്തിന്റെ തണുപ്പ് അവസാനിക്കുമെന്നാണ് കരുതുന്നതെന്ന് കാലാവസ്ഥാ നിരീക്ഷണ കേന്ദ്രം അറിയിച്ചിരിക്കുന്നത്. മുന്‍ വര്‍ഷങ്ങളില്‍ ഇല്ലാത്ത രീതിയിലുള്ള തണുപ്പായിരുന്നു കഴിഞ്ഞ ദിവസങ്ങളില്‍ രാജ്യത്ത് അനുഭവപ്പെട്ടത്.ശീതകാറ്റ് അവസാനിക്കുന്നതോടെ സമതല പ്രദേശങ്ങളില്‍ താപനില അഞ്ച് ഡിഗ്രിയും പര്‍വത മേഖലകളില്‍ രണ്ട് മുതല്‍ മൂന്ന് ഡിഗ്രി വരെയും ഉയരുമെന്നാണ് കരുതുന്നത്. വരണ്ട തണുത്ത കാറ്റിന് ഒപ്പം വടക്കുകിഴക്കന്‍ കാറ്റ് കൂടി വീശിയതിനാലാണ് താപനില സാധാരണയിലും താഴേക്ക് പോയത്. അടുത്തയാഴ്ച വീണ്ടും ശീതകാറ്റ് ഉണ്ടാകാന്‍ സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു.വെള്ളിയാഴ്ച ദാഖിലിയ ഗവര്‍ണറേറ്റിലെ സൈഖില്‍ മൈനസ് ഒമ്ബതു ഡിഗ്രി സെല്‍ഷ്യസ് ആണ് രേഖപ്പെടുത്തിയത്.

ശനിയാഴ്ച റുസ്താഖിന്റെ മലമ്ബ്രദേശങ്ങളിലും മഞ്ഞുവീഴ്ചയുണ്ടായി. മസ്‌കത്ത് ഗവര്‍ണറേറ്റില്‍ ഇന്നലെ താപനില 12 ഡിഗ്രി വരെ താഴ്ന്നു. മരുഭൂ പ്രദേശങ്ങളില്‍ കാറ്റിനെ തുടര്‍ന്ന് പൊടിപടലങ്ങള്‍ ഉയര്‍ന്നതിനാല്‍ ദൂരക്കാഴ്ചയും കുറഞ്ഞു. കടലും പ്രക്ഷുബ്ധമായിരിക്കുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. തിരമാലകള്‍ മൂന്നുമീറ്റര്‍ വരെ ഉയരാന്‍ സാധ്യതയുണ്ട്. അല്‍ ഹജര്‍ പര്‍വതനിരകളിലും മസ്‌കത്ത് ഗവര്‍ണറേറ്റിന്റെ ഭാഗങ്ങളിലും മേഘങ്ങള്‍ രൂപപ്പെടാനിടയുണ്ട്. അന്തരീക്ഷത്തിലേക്ക് പൊടിപടലങ്ങള്‍ എത്തുന്നതിനാല്‍ ഒമാന്‍ കടലിന്റെ തീരപ്രദേശങ്ങളില്‍ ദൂരക്കാഴ്ച കുറയാനും സാധ്യതയുണ്ടെന്ന് കാലാവസ്ഥ കേന്ദ്രം അറിയിച്ചു. തണുപ്പിനെ തുടര്‍ന്ന് വാരാന്ത്യത്തില്‍ ആളുകള്‍ പുറത്തിറങ്ങുന്നത് കുറഞ്ഞു. തണുപ്പിനെ പ്രതിരോധിക്കാനുള്ള വസ്ത്രങ്ങള്‍ വില്‍പന നടത്തുന്നവര്‍ സന്തോഷത്തിലാണ്. മുന്‍വര്‍ഷങ്ങളേക്കാള്‍ നല്ല കച്ചവടം നടക്കുന്നുണ്ടെന്ന് ഇവര്‍ പറഞ്ഞു. തൊപ്പികള്‍, ജാക്കറ്റുകള്‍, ഗ്ലൗസ്, കമ്ബിളി പുതപ്പ് തുടങ്ങിയവ വിറ്റുപോകുന്നുണ്ട്. സോക്‌സിനാണ് ആവശ്യക്കാര്‍ കൂടുതല്‍. അതിനാല്‍ സോക്‌സ് കിട്ടാനില്ലാത്ത അവസ്ഥയാണ്.