മൂന്ന് തവണ മത്സരിച്ചവരെ മാറ്റി നിര്‍ത്താന്‍ സിപിഐ

മൂന്ന് തവണ തുടര്‍ച്ചയായി നിയമസഭയിലേക്ക് തെരഞ്ഞെടുക്കപ്പട്ടവരെ മാറ്റി നിര്‍ത്താന്‍ സിപിഐ. യുവനേതാക്കള്‍ക്ക് പരിഗണന നല്‍കാന്‍ ലക്ഷ്യമിട്ടുള്ള പ്രാരംഭ ചര്‍ച്ചകള്‍ക്കാണ് സിപിഐ തുടക്കമിടുന്നത്. ജില്ലകളില്‍ നിലനില്‍ക്കുന്ന ആഭ്യന്തര പ്രശ്‌നങ്ങളും ചര്‍ച്ചകളിലേക്ക് കടക്കുമ്പോള്‍ സിപിഐക്ക് തലവേദനയാണ്. നിയമസഭയില്‍ ഹാട്രിക്ക് തികച്ചവര്‍ എത്ര വമ്പനായാലും ഇത്തവണ സാധ്യതകളടയും എന്ന സൂചനകളാണ് സിപിഐയില്‍ ഉയരുന്നത്. സി.ദിവാകരന്‍, മുല്ലക്കര രത്‌നാകരന്‍, വി.എസ്.സുനില്‍കുമാര്‍, ബിജിമോള്‍, തിലോത്തമന്‍, കെ.രാജു പാര്‍ട്ടിയിലെ പ്രമുഖരാണ് മൂന്ന് ടേം പൂര്‍ത്തിയാക്കുന്നത്. പുതിയ നയം നടപ്പായാല്‍ ഇവരെയെല്ലാം പാര്‍ട്ടി മാറ്റിനിര്‍ത്തേണ്ടി വരും.
നെടുമങ്ങാടും,തൃശൂരും നിലവിലെ സ്ഥാനാര്‍ത്ഥികളെ മാറ്റി പരീക്ഷിച്ചാല്‍ കൈപൊള്ളുമോ എന്ന സംശയം പാര്‍ട്ടിക്കുണ്ട്. എന്നാല്‍ പൊതുനയം വന്നാല്‍ ഇവരുടെ കാര്യത്തിലും വേര്‍തിരിവുണ്ടാകില്ല. ഇ.ചന്ദ്രശേഖരന്‍,ജയലാല്‍ അടക്കം രണ്ട് ടേം പൂര്‍ത്തിയാക്കുന്ന അരഡസന്‍ എംഎല്‍എമാരുടെ കാര്യവും ഉറപ്പിച്ചിട്ടില്ല. യുവ പ്രാതിനിധ്യം സിപിഎം വിജയകരമായി പരീക്ഷിക്കുമ്പോള്‍ സിപിഐയും പതിവ് ശൈലികള്‍ വിട്ടേക്കും. മുതിര്‍ന്ന നേതാക്കളുടെ വലിയ ഒരു നിരയൊഴിഞ്ഞാലും മഹേഷ് കക്കത്ത്, ശുഭേഷ് സുധാകര്‍, ജിസ്‌മോന്‍, സജിലാല്‍ തുടങ്ങി പുതുനിരയും സജ്ജമാണ്. പി.വസന്തം,ദേവിക തുടങ്ങിയ വനിതാനേതാക്കളുടെ പേരുകളും പ്രാരംഭ ചര്‍ച്ചകളില്‍ സജീവമായി ഉയര്‍ന്നിട്ടുണ്ട്. വിഭാഗീയ പ്രശ്‌നങ്ങള്‍ തലവേദനയായ കൊല്ലം ജില്ലയിലെ സ്ഥാനാര്‍ത്ഥി നിര്‍ണ്ണയമാണ് പാര്‍ട്ടിക്ക് പ്രധാന തലവേദന.
പി പ്രസാദ്, ചിഞ്ചുറാണി അടക്കം സംസ്ഥാന എക്‌സിക്യൂട്ടീവിലെ പ്രമുഖരെയും സുരക്ഷിത മണ്ഡലങ്ങളില്‍ ആലോചിക്കുന്നുണ്ട്. ജോസ് പക്ഷത്തിന്റെ സിറ്റിംഗ് സീറ്റായ കാഞ്ഞിരപ്പള്ളിയില്‍ അനിശ്ചിതത്വം നില്‍ക്കുമ്പോള്‍ പകരം പൂഞ്ഞാര്‍ ചോദിക്കാനും സാധ്യതയേറിയിട്ടുണ്ട്. തദ്ദേശ തെരഞ്ഞെടുപ്പിലെ മികച്ച പ്രകടനമാണ് അനുകൂല ഘടകം. ജില്ലാ കമ്മിറ്റികളുടെ കൂടി പ്രാഥമിക നിര്‍ദ്ദേശങ്ങള്‍ തേടിയ ശേഷം ജനുവരി അവസാനത്തോടെ സ്ഥാനാര്‍ത്ഥി നിര്‍ണ്ണയ ചര്‍ച്ചകള്‍ സജീവമാക്കാനാണ് സിപിഐ നേതൃത്വത്തിന്റെ തീരുമാനം.