കെ.എം. ഷാജിക്കെതിരെ നിര്‍ണ്ണായക രേഖകള്‍ ലഭിച്ചതായി വിജിലന്‍സ് അന്വേഷണ ഉദ്യോഗസ്ഥന്‍

അഴീക്കോട് സ്‌കൂള്‍ കോഴക്കേസുമായി ബന്ധപ്പെട്ട് കെ.എം. ഷാജി എംഎല്‍എയെ വിണ്ടും വിജിലന്‍സ് ചോദ്യം ചെയ്തു. സ്‌കൂളിന് പ്ലസ്ടു അനുവദിച്ചതിന് 25 ലക്ഷം രൂപ കോഴ വാങ്ങിയെന്ന കേസില്‍ കെ.എം. ഷാജിക്കെതിരെ നിര്‍ണ്ണായക രേഖകള്‍ ലഭിച്ചതായി വിജിലന്‍സ് അന്വേഷണ ഉദ്യോഗസ്ഥന്‍ ഡിവൈ എസ് പി ബാബു പെരിങ്ങേത്ത്. കേസില്‍ എംഎല്‍എയുടെ ചോദ്യം ചെയ്യല്‍ പൂര്‍ത്തിയാകാത്തതിനാല്‍ ഇനിയും വിളിപ്പിക്കും. നിര്‍ണ്ണായക രേഖകള്‍ ലഭിച്ചിട്ടുണ്ട്. പൂര്‍ണ്ണ തെളിവുകള്‍ ലഭിച്ചാലാകും അറസ്റ്റ്. കേസുമായി ബന്ധപ്പെട്ട് ലീഗിന്റെ സംസ്ഥാന നേതാക്കളെയും വിളിപ്പിക്കേണ്ടി വരുമെന്നും അദ്ദേഹം കൂട്ടിച്ചേര്‍ത്തു. കണ്ണൂര്‍ വിജിലന്‍സ് ഓഫീസില്‍ വച്ചായിരുന്നു മൂന്നുമണിക്കൂര്‍ നീണ്ട ചോദ്യം ചെയ്യല്‍ ഇന്നലെ നടന്നത്. എന്നാല്‍ കേസ് രാഷ്ട്രീയ പ്രേരിതമാണെന്നും ഗൂഢാലോചനക്ക് പിന്നില്‍ മുഖ്യമന്ത്രിയാണെന്നും ചോദ്യം ചെയ്യലിന് ശേഷം ഷാജി മാധ്യമങ്ങളോട് പ്രതികരിച്ചു. വിജിലന്‍സിന്റെ എല്ലാ ചോദ്യങ്ങള്‍ക്കും മറുപടി നല്‍കിയിട്ടുണ്ട്. കേസില്‍ ഒരു തെളിവും ഇല്ലെന്ന ഉറച്ച ബോധ്യമുണ്ട്. രാഷ്ട്രീയ പ്രേരിതമാണ് കേസ് എന്നും കരുതി കേസിനെ നേരിടാതിരിക്കാനാവില്ല. ആവശ്യപ്പെട്ട രേഖകള്‍ നല്‍കിയിട്ടുണ്ട്. ചോദ്യങ്ങള്‍ക്ക് കൃത്യമായ മറുപടി നല്‍കിയതായും ഷാജി പ്രതികരിച്ചു. കേസുമായി ബന്ധപ്പെട്ട് കഴിഞ്ഞദിവസം ഇഡി സംഘം അഴീക്കോട് സ്‌കൂളിലെത്തി തെളിവെടുത്തിരുന്നു. മാനേജര്‍, മുന്‍ മാനേജര്‍ എന്നിവരില്‍ നിന്നാണ് വിവരങ്ങള്‍ ശേഖരിച്ചിരുന്നു.കഴിഞ്ഞ യുഡിഎഫ് ഭരണത്തില്‍ അഴീക്കോട് ഹൈസ്‌കൂളില്‍ പ്ലസ്ടു ബാച്ച് അനുവദിക്കാന്‍ കെഎം ഷാജി സ്‌കൂള്‍ മാനേജ്‌മെന്റില്‍നിന്ന് 25 ലക്ഷം രൂപ കൈക്കൂലി വാങ്ങിയെന്നാണ് കേസ്. 2014ലാണ് സംഭവം. 2017ല്‍ മുസ്ലീംലീഗ് അഴീക്കോട് പഞ്ചായത്ത് കമ്മിറ്റി വൈസ് പ്രസിഡന്റ് നൗഷാദ് പൂതപ്പാറ നേതൃത്വത്തിന് പരാതി നല്‍കിയതോടെയാണ് സംഭവം പുറത്തുവന്നത്.