ഉത്തര്‍പ്രദേശിലും ജനിതകമാറ്റം വന്ന കോവിഡ്; രണ്ടു വയസുകാരിക്ക് രോഗം

ലക്നൗ: ഉത്തര്‍പ്രദേശിലും ജനിതകമാറ്റം വന്ന കോവിഡ് സ്ഥിരീകരിച്ചു. ഉത്തര്‍പ്രദേശിലെ മിററ്റില്‍ രണ്ടു വയസുകാരിക്കാണ് ജനിതകമാറ്റം വന്ന കോവിഡ് രോഗം സ്ഥിരീകരിച്ചത്. ബ്രിട്ടണില്‍ നിന്ന് വന്ന കുഞ്ഞിനാണ് രോഗം സ്ഥിരീകരിച്ചത്. കുട്ടിയുടെ മാതാപിതാക്കള്‍ക്കും കോവിഡ് സ്ഥിരീകരിച്ചിട്ടുണ്ട്. എന്നാല്‍ ഇത് പുതിയ വകഭേദമല്ല.

അതേസമയം കുട്ടിയേയും മാതാപിതാക്കളെയും മിററ്റിലെ സുഭാരതി മെഡിക്കല്‍ കോളേജില്‍ പ്രവേശിപ്പിച്ചു. ഇതോടെ രാജ്യത്ത് ജനിതകമാറ്റം വന്ന കോവിഡ് സ്ഥിരീകരിച്ചവരുടെ എണ്ണം ഏഴായി. ഇന്നലെ ബ്രിട്ടനില്‍ നിന്ന് ഇന്ത്യയില്‍ എത്തിയ ആറ് പേര്‍ക്ക് രോഗം സ്ഥിരീകരിച്ചിരുന്നു.കര്‍ണാടകത്തില്‍ മൂന്നു പേര്‍ക്കും ആന്ധ്ര, തെലങ്കാന, തമിഴ്‌നാട് സംസ്ഥാനങ്ങളില്‍ ഒരോരുത്തര്‍ക്കുമാണ് പുതിയ വൈറസ് ബാധിച്ചത്.
നവംബര്‍ 25 മുതല്‍ ഡിസംബര്‍ 23 വരെ ബ്രിട്ടനില്‍ നിന്ന് 33,000 പേരാണ് ഇന്ത്യയിലെത്തിയത്. ഇവരില്‍ 114 പേര്‍ക്ക് കോവിഡ് സ്ഥിരീകരിച്ചു. ഇവരുടെ സ്രവ സാമ്പിളുകളില്‍ രാജ്യത്തെ പത്ത് ലാബുകളിലാണ് ജനിതക പരിശോധന നടത്തിയത്. ബംഗ്ലുരു നിംഹാന്‍സില്‍ മൂന്നു സാ്മ്പിളിലും, ഹൈദരാബാദിലെ സെന്റര്‍ ഫോര്‍ സെല്ലുലാര്‍ ആന്‍ഡ് മോളിക്കുലാര്‍ ബയോളജിയില്‍ രണ്ട് സാമ്പിളിലും പൂനെ നാഷണല്‍ ഇന്‍സ്റ്റിറ്റ്യൂട്ട് ഒഫ് വൈറോളജിയില്‍ ഒരു സാമ്പിളിലുമാണ് ജനിതകമാറ്റം വന്ന വൈറസിനെ കണ്ടെത്തിയത്.