തൊഴില്‍ വിദ്യാഭ്യാസ മേഖലകളില്‍ എല്ലാ കാറ്റഗറിയിലും 12 ശതമാനം സംവരണം ആവശ്യപ്പെട്ട് സമസ്ത

തൊഴില്‍ വിദ്യാഭ്യാസ മേഖലകളില്‍ എല്ലാ കാറ്റഗറിയിലും 12 ശതമാനം സംവരണം ആവശ്യപ്പെട്ട് സമസ്ത. ഇതുള്‍പ്പെടെ 15 ഇന നിര്‍ദേശങ്ങള്‍ അടങ്ങിയ നിവേദനം മലപ്പുറത്ത് നടന്ന കേരള പര്യടന പരിപാടിയില്‍ സമസ്ത നേതാക്കള്‍ മുഖ്യമന്ത്രിക്ക് സമര്‍പ്പിച്ചു. തൊഴില്‍, വിദ്യാഭ്യാസം തുടങ്ങി മേഖലകളിലെ എല്ലാ കാറ്റഗറികളിലും എല്ലാ തസ്തികകളിലും മുസ്ലിം വിഭാഗത്തിന് 12 ശതമാനം സംവരണം ഉറപ്പ് വരുത്തണമെന്ന ആവശ്യമാണ് സമസ്ത മുന്നോട്ടു വെച്ചത്. നിലവില്‍ സംവരണം ലഭിക്കുന്ന ആര്‍ക്കും കുറവ് വരുത്തില്ലെന്ന് ഉറപ്പ് നല്‍കിയതായും മുഖ്യമന്ത്രി അനുകൂല നിലപാട് സ്വീകരിച്ചതായും സമസ്ത പ്രതിനിധികള്‍ പ്രതികരിച്ചു.
അതേസമയം പരിപാടിക്കിടയില്‍ മുഖ്യമന്ത്രി വേദനിപ്പിക്കുന്ന രീതിയില്‍ പ്രതികരിച്ചുവെന്ന വിമര്‍ശനവുമായി ഓര്‍ത്തഡോക്സ് സഭ പ്രതിനിധി രംഗത്ത് വന്നു. സഭ തര്‍ക്കത്തിലും സംവരണ വിഷയത്തിലുമുള്ള ചോദ്യങ്ങളോട് മുഖ്യമന്ത്രിയുടെ മറുപടി വേദനിപ്പിച്ചുവെന്നും സംഭവത്തില്‍ ദുഃഖമുണ്ടെന്നും മലങ്കര ഓര്‍ത്തഡോക്സ് സഭ മലബാര്‍ ഭദ്രാസനം സെക്രട്ടറി ഫാ. തോമസ് കുര്യന്‍ തഴയില്‍ പറഞ്ഞു. ജില്ലയിലെ മത, സമുദായിക നേതാക്കള്‍, സാംസ്‌കാരിക പ്രവര്‍ത്തകര്‍, വ്യവസായ പ്രമുഖര്‍, സംരഭകര്‍, വിവിധ മേഖലകളിലെ വിദഗ്ധര്‍ എന്നിവരുമായും മുഖ്യമന്ത്രി കൂടിക്കാഴ്ച നടത്തി.