ഷവോമി MI 11 സ്മാര്‍ട്ട് ഫോണിനൊപ്പം ഇനി ചാര്‍ജര്‍ ലഭിക്കില്ല

ബെയിജിംഗ്: ഐ ഫോണിനു പുറമെ ചൈനീസ് കമ്പനിയായ ഷവോമിയുടെ പുറത്തിറക്കാന്‍ പോവുന്ന MI 11 സ്മാര്‍ട്ട് ഫോണിനൊപ്പം ചാര്‍ജര്‍ ലഭിക്കില്ലെന്നു ഷവോമി സിഇഒ ലേ ജുന്‍ സ്ഥിരീകരിച്ചു. ആപ്പിള്‍ മാതൃകയിലുള്ള പരീക്ഷണമാണ് ഷവോമി നടത്താനിരിക്കുന്നതെന്നാണ് ടെക് വിദഗ്ധര്‍ പറയുന്നത്. എംഐ 11 ന്റെ റീട്ടെയില്‍ പാക്കേജിന്റെ ഒരു ചിത്രം കഴിഞ്ഞ ദിവസം പുറത്തു വിട്ടിരുന്നു. ഡിസംബര്‍ 28-നാണ് ഷവോമി MI 11 ലോഞ്ച് ചെയ്യുന്നത്. അതിനിടയിലാണ് പുതിയ വെളിപ്പെടുത്തല്‍. 108 എം.പി ക്യാമറയെന്ന സവിശേഷതയുമായാണ് MI 11 പുറത്തിറങ്ങുന്നത്. സ്‌നാപ്പ് ഡ്രാഗണ്‍ 888 പ്രോസ്സറില്‍ 12 ജിബി 8 ജിബി റാമുകളില്‍ ഫോണ്‍ ലഭ്യമാണ്.

ആന്‍ഡ്രോയിഡ് 11 ഒ.എസില്‍ പ്രവര്‍ത്തിക്കുന്ന ഫോണ്‍ ക്യ.എച്ച്.ഡി റസലൂഷനാണ്. 8 ജിബി റാമും, 256 ജിബി ഇന്റേണല്‍ മെമ്മറിയുമടങ്ങുന്ന വേരിയന്റിന്റെ വില 54000 ഉം, 12 ജിബി റാമും, 256 ജിബി സ്റ്റോറേജും അടങ്ങുന്ന മോഡലിന് 586000 രൂപയുമാണ് പ്രതീക്ഷിക്കുന്ന വില. ഫോണിന്റെ (Smart Phone) ചിത്രങ്ങള്‍ ഇതിനകം തന്നെ സാമൂഹിക മാധ്യമങ്ങളിലടക്കം ലീക്കായിരുന്നു. ജനുവരി അവസാനത്തോടെ MI 11 ഇന്ത്യയിലേക്ക് എത്തുമെന്നാണ് പ്രതീക്ഷീക്കുന്നത്. എന്നാല്‍ ചാര്‍ജര്‍ ഒഴിവാക്കിയത് പ്രകൃതി സംരക്ഷണത്തിന്റെ ഭാഗമാണെന്നാണ് ജുന്‍ പറയുന്നത്. ചാര്‍ജര്‍ ആവശ്യമുള്ളവര്‍ക്ക് ചാര്‍ജര്‍ പ്രത്യേകം വാങ്ങാനാവുമെന്നും അദ്ദേഹം പറയുന്നു.