കാര്‍ഷികരംഗവും കര്‍ഷകസമൂഹവും നേരിടുന്ന ഗുരുതരപ്രശ്‌നങ്ങള്‍ ചര്‍ച്ചചെയ്യാന്‍ നിയമസഭ പ്രത്യേക സമ്മേളനം 31ന്

തിരുവനന്തപുരം: കാര്‍ഷികരംഗവും കര്‍ഷകസമൂഹവും നേരിടുന്ന ഗുരുതരപ്രശ്‌നങ്ങള്‍ ചര്‍ച്ചചെയ്യാന്‍ നിയമസഭയുടെ പ്രത്യേക സമ്മേളനം 31 വ്യാഴാഴ്ച ചേരും. ഞായറാഴ്ച ഇതുസംബന്ധിച്ച ഫയലില്‍ ഒപ്പിട്ടേക്കുമെന്ന് ഗവര്‍ണറുടെ ഓഫീസ് വൃത്തങ്ങള്‍ വ്യക്തമാക്കി. 14-ാം കേരള നിയമസഭയുടെ 21-ാം സമ്മേളനം 31നു വിളിച്ചുചേര്‍ക്കാനുള്ള മന്ത്രിസഭാ ശുപാര്‍ശ അംഗീകരിക്കുമെന്ന നിലപാടിലാണ് ഗവര്‍ണര്‍.
ഭക്ഷ്യധാന്യങ്ങള്‍ക്ക് ഇതരസംസ്ഥാനങ്ങളെ ഗണ്യമായി ആശ്രയിക്കുന്ന കേരളത്തിന് കര്‍ഷകര്‍ നേരിടുന്ന പ്രശ്‌നങ്ങള്‍ ഏറെ ഉല്‍ക്കണ്ഠയുണ്ടാക്കുന്നതാണെന്ന സര്‍ക്കാര്‍ നിലപാട് അംഗീകരിച്ചാണ് സമ്മേളനത്തിന് ഗവര്‍ണര്‍ അനുമതി നല്‍കുന്നത്.

പൊതുതാല്‍പ്പര്യ വിഷയമായതിനാല്‍ നിയമസഭ ചര്‍ച്ച ചെയ്യുന്നത് ഉചിതമാണെന്ന നിലപാട് സര്‍ക്കാര്‍ ഗവര്‍ണറെ അറിയിച്ചു. മുഖ്യമന്ത്രി നല്‍കിയ കത്തിലും ഇക്കാര്യം വ്യക്തമാക്കി. മന്ത്രിമാരായ എ കെ ബാലനും വി എസ് സുനില്‍കുമാറും ഗവര്‍ണറെ സന്ദര്‍ശിച്ച് സമ്മേളനം ചേരേണ്ടതിന്റെ പ്രാധാന്യം വിശദീകരിച്ചു. വര്‍ഷാരംഭത്തിലെ ആദ്യ സഭാസമ്മേളനത്തിലെ നയപ്രഖ്യാപന പ്രസംഗത്തിന് ക്ഷണിക്കാന്‍ സ്പീക്കര്‍ പി ശ്രീരാമകൃഷ്ണനും ഗവര്‍ണറെ സന്ദര്‍ശിച്ചു. ജനുവരി എട്ടിനാണ് സമ്മേളനം തുടങ്ങുക.