കമറുദ്ദീനും പൂക്കോയ തങ്ങള്‍ക്കുമെതിരെ തലശേരിയില്‍ വിശ്വാസ വഞ്ചനക്ക് കേസ്

ഫാഷന്‍ ഗോള്‍ഡ് ജ്വല്ലറി തട്ടിപ്പില്‍ ഇപ്പോള്‍ ജയിലില്‍ കഴിയുന്ന ലീഗ് നേതാവ് എം.സി. കമറുദ്ദീന്‍ എംഎല്‍എയുടെയും ഒളിവില്‍ പോയ ചന്തേരയിലെ പൂക്കോയ തങ്ങളുടേയും പേരില്‍ തലശേരി പൊലീസില്‍ രണ്ട് വിശ്വാസ വഞ്ചനക്കേസ് കൂടി. തൂവ്വക്കുന്ന് സ്വദേശിനി കാരായില്ലത്ത് സുഹറ, കൊളവല്ലൂര്‍ സ്വദേശി കുനിയില്‍ വീട്ടില്‍ മൂസ്സ എന്നിവരുടെ പരാതിയിലാണ് ഇന്ത്യന്‍ ശിക്ഷാ നിയമം 420 വകുപ്പില്‍ കേസെടുത്തത് . ഇരുവരും തലശേരി ജുഡീഷ്യല്‍ ഒന്നാം ക്ലാസ് മജിസ്‌ട്രേട്ട് കോടതിയില്‍ സമര്‍പ്പിച്ച ഹര്‍ജിയെ തുടര്‍ന്ന് കോടതി നിര്‍ദ്ദേശ പ്രകാരമാണ് കേസെടുത്തത്. സുഹറയുടെ പരാതിയില്‍ പൂക്കോയ തങ്ങളാണ് കുറ്റാരോപിതന്‍. മൂസ്സ പരാതിക്കാരനായ കേസില്‍ എം.സി. കമറുദ്ദീനും പൂക്കോയ തങ്ങളും പ്രതിസ്ഥാനത്തുണ്ട്. 2008ലാണ് കേസിനാസ്പദമായ സംഭവം നടന്നതെന്ന് പരാതിയില്‍ പറയുന്നു. പ്രവര്‍ത്തനം ആരംഭിക്കാനിരിക്കുന്ന ജ്വല്ലറിയില്‍ പണം നിക്ഷേപിച്ചാല്‍ മാസംപ്രതി നല്ലൊരു തുക ലാഭവിഹിതമായി കിട്ടുമെന്ന് പറഞ്ഞ് വിശ്വസിപ്പിച്ച് 5 ലക്ഷം വീതം ഇരുവരില്‍ നിന്നും വാങ്ങിയെന്നാണ് ആരോപണം. ഫാഷന്‍ ഗോള്‍ഡ് നിക്ഷേപ തട്ടിപ്പ് കേസില്‍ നിലവില്‍ നൂറിലേറെ കേസുകള്‍ ഇരുവരുടെയും പേരില്‍ ചുമത്തപ്പെട്ടിട്ടുണ്ട്. 150 കോടിയിലേറെ രൂപ തട്ടിയെന്നാണ് സംശയം. തലശേരിയില്‍ രജിസ്ട്രര്‍ ചെയ്യപ്പെട്ട കേസില്‍ അന്വേഷണം ഊര്‍ജ്ജിതമാക്കുകയാണെങ്കില്‍ ഇപ്പോള്‍ കണ്ണൂര്‍ ജയിലില്‍ റിമാന്റ് തടവുകാരനായി അഴിയെണ്ണുന്ന മഞ്ചേശ്വരം എംഎല്‍എയെ തലശേരി പൊലീസിന് ജയിലിലെത്തി അറസ്റ്റ് ചെയ്യേണ്ടി വരും. ഇതിനായുള്ള അനുവാദം കോടതി നല്‍കണം. പുതിയ കേസുകളില്‍ കൂടി അറസ്റ്റ് നടന്നാല്‍ എംഎല്‍എയ്ക്ക് കുരുക്ക് മുറുകും. തലശേരി മേഖലയില്‍ മുസ്ലിം ലീഗുമായി അടുത്ത ബന്ധമുള്ള ചില സമ്പന്നരും ഖമറുദ്ദീന്‍ കമ്പനിയുടെ തട്ടിപ്പില്‍ കുടുങ്ങിയതായി സൂചനയുണ്ട്. എന്നാല്‍ സമ്മര്‍ദ്ദം കാരണം ഇവര്‍ തല്‍ക്കാലം പരാതിപ്പെടുന്നില്ലെന്നാണ് വിവരം.