ആര്‍എസ്എസുകാര്‍ ജയ്ശ്രീറാം ബാനര്‍ ഉയര്‍ത്തിയ സംഭവം; പാലക്കാട് എംഎല്‍എ ഉറക്കത്തില്‍

പാലക്കാട്: പാലക്കാട് നഗരസഭാ ഓഫീസില്‍ ആര്‍എസ്എസുകാര്‍ ജയ്ശ്രീറാം ബാനര്‍ ഉയര്‍ത്തിയതില്‍ നാടൊന്നാകെ പ്രതിഷേധിച്ചിട്ടും പാലക്കാട് എംഎല്‍എയും യൂത്ത് കോണ്‍ഗ്രസ് സംസ്ഥാന പ്രസിഡന്റ്കൂടിയായ ഷാഫി പറമ്പില്‍ ഇതൊന്നും അറിഞ്ഞമട്ടില്ലാതെ ഉറക്കത്തിലാണ്്. എംഎല്‍എ രണ്ട് ദിവസമായിട്ടും ഇതേവരെ സംഭവത്തില്‍ ഒരക്ഷരം പ്രതികരിച്ചിട്ടില്ല. 16ന് പകല്‍ 12നാണ് നഗരസഭാ ഓഫീസില്‍ ജയ്ശ്രീറാം എന്നെഴുതിയ ബാനര്‍ ആര്‍എസ്എസ്-ബിജെപി പ്രവര്‍ത്തകര്‍ ഉയര്‍ത്തിയത്.മുഴുവന്‍ വാര്‍ത്താമാധ്യമങ്ങളിലും സംഭവം വാര്‍ത്തയായി. ഉടന്‍ സിപിഐ എം ജില്ലാസെക്രട്ടറി സി കെ രാജേന്ദ്രനും ഡിവൈഎഫ് ജില്ലാ സെക്രട്ടറിയറ്റും നിയമനടപടി ആവശ്യപ്പെട്ട് രംഗത്തുവന്നു.

വെള്ളിയാഴ്ച പകല്‍ 12ന് ഡിവൈഎഫ്ഐ നഗരസഭയിലേക്ക് പ്രതിഷേധ മാര്‍ച്ച് നടത്തുകയും ദേശീയപതാക ഉയര്‍ത്തുകയും ചെയ്തു. ഇത്രയൊക്കെ സംഭവിച്ചിട്ടും സ്ഥലം എംഎല്‍എകൂടിയായ യൂത്ത്‌കോണ്‍ഗ്രസ് നേതാവ് എന്തുകൊണ്ട് പ്രതികരിക്കുന്നില്ലെന്നാണ് പ്രവര്‍ത്തകര്‍ ചോദിക്കുന്നത്.സ്വന്തം മൂക്കിന്താഴെ ആര്‍എസ്എസുകാര്‍ നടത്തിയ നിയമവിരുദ്ധപ്രവര്‍ത്തനം അറിഞ്ഞില്ലെന്ന് നടിക്കുന്നത് ബിജെപിയുമായി കോണ്‍ഗ്രസ് ഉണ്ടാക്കിയ തെരഞ്ഞെടുപ്പ്ബന്ധം പുറത്തുവരുമോ എന്ന ഭയംമൂലമാകാമെന്നാണ് സംശയം.പാലക്കാട് നഗരസഭയിലും ബിജെപിയെ സഹായിക്കുന്ന നിലപാടായിരുന്നു കോണ്‍ഗ്രസിന്റേത്.